113 myń elordalyq ımmýndaý kýrsyn tolyq aıaqtady
NUR-SULTAN. QazAqparat – Elordada 113 myń adam koronavırýsqa qarsy vaktsınanyń 2 komponentin tolyq aldy. Bul týraly Nur-Sultan qalalyq qoǵamdyq densaýlyq saqtaý basqarmasy basshysynyń mindetin atqarýshy Álııa Rústemova aıtty, dep habarlaıdy QazAqparat tilshisi.
«Búginde 170 myńnan astam adam nemese vaktsınatsııa alýǵa jatatyn halyqtyń 26 paıyzy vaktsınanyń 1 komponentin aldy. 113 myńnan astam azamat ımmýndaý kýrsyn tolyǵymen aıaqtady. Vaktsınanyń birinshi komponentiniń 59 myńnan astam, ekinshi komponenttiń 55 myńnan astam qalǵan dozasy bar. Halyqty vaktsınatsııamen qamtý úshin biz medıtsınalyq uıymdardaǵy egý pýnktteriniń sanyn 3 ese arttyrdyq. Olardyń jumys kestesi jeksenbi men mereke kúnderin qosa alǵanda tańǵy saǵat 8:00-den 22:00-ge deıin uzartyldy. Búgingi tańda vaktsınanyń 3 túri reseılik Sputnik - V, otandyq QazVac jáne qytaılyq - Hayat-Vaks bar», - dedi Álııa Rústemova.
Sondaı-aq ol halyqty vaktsınatsııalaýmen tolyqtaı qamtý úshin Han-Shatyr, MegaSilkWay, Kerýen, Abý-Dabı Plaza, Azııa Park, SaryArqa, Evrazııa saýda-oıyn-saýyq ortalyqtarynda, Mechta dúkeni men Álem bazarynda egý pýnktteriniń uıymdastyrylǵanyn aıtty.
«Osy ýaqyt aralyǵynda saýda jáne oıyn-saýyq ortalyqtarynda 29 myńnan astam adam vaktsınatsııalandy. Buǵan deıin Ortalyq bazar men Bıg Shanhaıda jáne Artem saýda úıinde vaktsınatsııa ortalyqtary ashylǵany týraly habarlaǵan bolatynbyz. Alaıda, bul mekemelerde vaktsınatsııa jumystarynyń tómen deńgeıde júrgizilgendikten, ondaǵy pýnktterdi jabý týraly sheshim qabyldandy», - dedi ol.
