ShQO-da janýarlardy qorǵaý mekemesinen 11,3 mln teńgeniń zańbuzýshylyǵy anyqtaldy
ASTANA. KAZINFORM — Shyǵys Qazaqstan oblysynyń Ulan aýdanynda prokýratýra «Ulan-Vet» ShJQ KMK qyzmetin tekserý barysynda bıýdjet jáne eńbek zańnamasynyń buzylǵanyn anyqtady.
Oblystyq prokýratýranyń málimetinshe, tekserý kezinde qyzmetkerlerge eńbekaqyny zańsyz esepteý, negizsiz syıaqy berý, qujatpen rastalmaǵan tólemder jasaý jáne jalǵan issapar shyǵyndaryn rásimdeý faktileri áshkerelengen. Sonymen qatar janýarlardy ustaý, sterılızatsııalaý, vaktsınatsııalaý jáne keıin bosatý baǵdarlamasyn iske asyrý kezinde de zańbuzýshylyqtarǵa jol berilgen.
Vedomstvonyń habarlaýynsha, bul zańbuzýshylyqtar saldarynan memleketke kelgen shyǵynnyń jalpy somasy 11,3 mln teńge bolǵan.
— Tekserý barysynda mekeme qyzmetkerleriniń jeke qorǵanys quraldarymen qamtamasyz etilmegeni anyqtaldy. Budan bólek, qaýipsizdik tehnıkasy boıynsha mindetti oqýdan ótpegen adamdardyń jumysqa jiberilgeni belgili boldy, — delingen habarlamada.
Prokýrorlyq qadaǵalaý aktisi boıynsha bes laýazymdy tulǵa tártiptik jaýaptylyqqa, al eki basshy ákimshilik jaýaptylyqqa tartyldy.
Qazirgi ýaqytta memleket kirisine 5,5 mln teńge óndirildi. Qalǵan somany óndirip alý jáne anyqtalǵan zańbuzýshylyqtardy tolyq joıý jumystary jalǵasyp jatyr.
Eske salaıyq, buǵan deıin SQO-da qurylys kezinde 380 mln teńge bıýdjet qarajatyn jymqyrý deregi anyqtalǵanyn jazǵanbyz.
