112 jastaǵy japondyq álemdegi eń qart er adam dep tanyldy
NUR-SULTAN. QazAqparat – Gınnestiń rekordtar kitaby Jerdegi eń qart er adam retinde 112 jastaǵy japondyq Chıtetsý Vatanabeni atady. Bul týraly Kyodo News habarlaıdy.
«Vatanabe álemdegi eń qart er adam dep munyń aldyndaǵy osy tıtýldyń ıegeri Japonııanyń soltústigindegi Hokkaıdo aralynda turatyn Masadzo Nonaka 2019 jyldyń 20 qańtarynda 113 jasynda qaıtys bolǵan soń tanyldy», - delingen habarlamada.
Atalyp ótilgendeı, Vatanabe 1907 jyldyń 5 naýryzynda fermerler otbasynda týǵan. Ol Taıvanǵa 20 jasynda kóship kelip, 18 jyl tirshilik keshken. Japonııaǵa Ekinshi dúnıejúzilik soǵystan keıin oralyp, zeınetke shyqqansha memlekettik qyzmette jumys istedi.
Onyń 5 balasy, 12 nemeresi, 16 shóberesi jáne bir shópshegi bar.
Qazirgi ýaqytta ol Nııgata prefektýrasynda Dzeetsý qalasynda qarttar úıinde turyp jatyr.
Er adam densaýlyǵyna shaǵym aıtpaıdy, ómirin uzartqan kúlki dep esepteıdi.
