«111» senim telefony júzdegen qazaqstandyq balany qutqaryp qaldy - Zaǵıpa Balıeva

ASTANA. QazAqparat - «111» senim telefony arqyly 111 qazaqstandyq bala qutqarylǵan. Bul týraly Qazaqstan Respýblıkasyndaǵy bala quqyqtary jónindegi ýákil, Parlament Májilisiniń depýtaty Zaǵıpa Balıeva Búkilálemdik balalar kúnine oraı uıymdastyrylǵan halyqaralyq konferentsııa barysynda málim etti, dep habarlaıdy «QazAqparat» HAA tilshisi.

«Meniń áriptesterim - Parlament depýtattary men Úkimettiń qoldaýy arqasynda «111» senim telefony jumysyn bastady. Osy aralyqta biz kóptegen balalarǵa qol ushymyzdy sozdyq. Qandaı kórsetkishpen maqtana alamyz - biz 7 myń balaǵa kómek kórsetip, olardyń 111-niń ómirin saqtap qalyp, psıhologııalyq kómek kórsettik. Biz barlyq quqyq qorǵaý organdaryn, mınıstrlikterdi biriktire otyryp, kelisimderge kelip, jas jetkinshekterge qoldaý bildirip kelemiz», - deıdi Zaǵıpa Balıeva.

Onyń aıtýynsha, ómirde qıyn jaǵdaıǵa tap bolǵan balalar «111» nómirine kez kelgen ýaqytta tegin habarlasyp, kómek ala alady. Endigi kezekte búkilálemdik «Chaıld help laın» jelisine qosylyp, qazaqstandyq «111» nómiriniń qyzmetin búkil álemniń balalarynyń kádesine jaratsa degen maqsat bar.

Zaǵıpa Balıeva, sonymen birge, jastar men balalarǵa arnalǵan uıymdardyń kúshin biriktire otyryp, Qazaqstan jastary men balalarynyń Kongresin ótkizý kózdelip otyrǵanyn habarlady.

Aıta ketsek, konferentsııa úkimettik emes sektor men halyqaralyq uıymdardyń ókilderimen birge balalar quqyǵy jónindegi ombýdsmenmen seriktese jumys júrgizý aıasynda ótkizilip otyr. Konferentsııanyń jumysyn júrgizý 20-21 qarashaǵa kózdelgen. Oǵan memlekettik organdardyń ókilderi, Parlament depýtattary, ÚEM músheleri, halyqaralyq sarapshylar, halyqaralyq uıymdardyń ókilderi men túrli uıymdardyń músheleri qatysýda.