«111» nómirine 17 myń bala habarlasqan – Mınıstrlik

ASTANA. KAZINFORM – Elimizdiń barlyq óńirinde balalar men ata-analarǵa kásibı kómek kórsetetin Psıhologııalyq qoldaý ortalyqtary ashyldy. Onda shamamen 250 myń adam kómek aldy. Bul týraly QR Oqý-aǵartý vıtse-mınıstri Edil Ospan aıtyp berdi.

− 2023–2025 jyldarǵa arnalǵan balalardy zorlyq-zombylyqtan qorǵaý, sýıtsıdtiń aldyn alý jáne olardyń quqyqtary men ál-aýqatyn qamtamasyz etý jónindegi Keshendi jospar aıasynda barlyq óńirde balalar men ata-analarǵa kásibı kómek kórsetetin Psıhologııalyq qoldaý ortalyqtary ashyldy. Qazir shamamen 250 myń adam kómek aldy, − dedi E.Ospan Ortalyq kommýnıkatsııalar qyzmetinde ótken baspasóz máslıhatynda.

Sonymen birge, áıelder men balalardyń quqyǵyn qorǵaý boıynsha 111 biryńǵaı memlekettik baılanys ortalyǵy iske qosyldy. Ol táýlik boıy jumys isteıdi jáne 2024 jyldyń qorytyndysy boıynsha balalardan 17 myń qońyraý túsken.

2024 jyldan bastap, bilim berý uıymdarynda oqýshylardyń QR-kod arqyly mátindik ótinish berý júıesi engizildi. Bul jasóspirimderge anonımdi túrde qoldaý suraýǵa múmkindik berdi. 2025 jyldyń aqpanyna qaraı – 25 myń SMS kelip túsken.

Aıta keteıik, 2025 jyldyń 1 qyrkúıeginen bastap, «DOSBOLLiKe» býllıngke qarsy jobasy elimizdiń barlyq mektepteri men kolledjderine engiziledi.