111 baılanys ortalyǵyna bir jylda 226 myń adam júgingen

ASTANA. KAZINFORM — 2024 jyldyń 1 maýsymy men 2025 jyldyń 31 mamyry aralyǵynda 111 baılanys ortalyǵyna shamamen 226 adam júgingen. Bul týraly «Azamattarǵa arnalǵan úkimet» memlekettik korporatsııasynan málim etti.

Memlekettik korporatsııa málimetinshe, 123 myńnan astam ótinish 111 qysqa nómiri arqyly tússe, 103 myńǵa jýyǵy mátindik habarlama retinde kelgen. Bul rette ótinishterdiń 122 myńy eresek adamdardan (onyń ishinde 13,5 myńǵa jýyq áıelden), 104 myńnan astamy balalardan túsken.
111 qysqa nómirine myna óńir turǵyndary jıi qońyraý shalady:

— Almaty — 10 myńnan astam;
— Astana — 6,4 myńnan astam;
— Shymkent — shamamen 5,6 myń;
— Túrkistan oblysy — shamamen 6,8 myń;
— Almaty oblysy — 6,3 myńǵa jýyq.

Eń az ótinishter myna óńirlerden túsken:

— Abaı oblysy — shamamen 1,6 myń;
— Soltústik Qazaqstan oblysy — 1,5 myńnan astam;
— Ulytaý oblysy — 900-ge jýyq.
— Degenmen, Almaty qalasynan, sonymen qatar Batys Qazaqstan, Túrkistan, Almaty jáne

Aqmola oblystarynan ótinishterdiń artqany baıqalady, — dep atap ótedi korporatsııadan.
Usynylǵan málimetke qaraǵanda, áıelder negizinen otbasyndaǵy zorlyq-zombylyq, alıment tólemeý, balalarǵa qamqorlyq, áleýmettik qorǵaý, baspanadan aıyrylý, psıhologııalyq qıyndyqtar jáne bala tárbıeleý máseleleri boıynsha jıi júginedi. Al balalar 111 baılanys ortalyǵyna otbasyndaǵy janjal, ata-analarynyń araqqa nemese esirtkige táýeldiligi, ata-analarynyń ajyrasýy, mekteptegi álimjettik, kıberbýllıng, qurdastarymen qarym-qatynastaǵy qıyndyqtar, oqýdaǵy problemalar, quqyqtarynyń buzylýy syndşy máseleler boıynsha qońyraý shalady.

— Sońǵy 12 aıda kelip túsken ótinishterdiń qorytyndysy boıynsha 1,5 myńnan astam jaǵdaı odan ary qarastyrý úshin quqyq qorǵaý organdaryna berildi, — dep atap ótedi korporatsııadan.

Aıta keteıik, 111 biryńǵaı baılanys ortalyǵy 2020 jyly iske qosylǵan edi.