1100 teńgesin qorqytyp alǵan: Jezqazǵan polıtsııasy 22 jyl burynǵy qylmysty ashty
Polisia.kz saıtynda málim etilgendeı, 1998 jyldyń 15 jeltoqsanynda qala dúkenderiniń birinde satýshy bolyp jumys isteıtin 37 jastaǵy áıel Jezqazǵan qalalyq polıtsııa bólimine júgingen. Ol túske qaraı belgisiz er adam saýda núktesine kirip, pyshaqpen qorqytyp 1 100 teńge aqshasyn alyp ketkeni týraly shaǵymdanǵan.
Qaraqshylyq faktisi boıynsha Jezqazǵan qalalyq polıtsııa bóliminiń tergeý bólimi sotqa deıingi tergeýdi bastaǵan. Іs 1999 jyldyń 17 aqpanynda úzilip, bıylǵy 31 mamyrda jańadan ashylǵan mán-jaılarǵa baılanysty qaıta jalǵastyrylǵan.
«Jedel-izdestirý is-sharalaryn júrgizý barysynda krımınaldyq polıtsııa qyzmetkerleri qaraqshylyq jasady degen kúdikpen 41 jastaǵy er adamdy anyqtap, ustady. Ol óz isin moıyndady», - delingen polıtsııa aqparatynda.