110 mektepte 1 myńnan astam sanıtarlyq-gıgıenalyq kemshilik bary habarlandy

NUR-SULTAN. QazAqparat – «Balaǵa laıyq» aktsııasynyń aralyq qorytyndysy shyǵaryldy. Bir aıda QR BǴM Balalardyń quqyqtaryn qorǵaý komıtetine 110 nysandaǵy sáıkessizdikter týraly 1 000-nan astam habarlama túsken, dep habarlaıdy QazAqparat mınıstrliktiń baspasóz qyzmetine silteme jasap.

«Aktsııanyń birinshi kezeńi aıaqtaldy. Jumysty belsendi júrgizý úshin barlyq oblystyń bilim basqarmalarymen, balalar ókildikterimen onlaın kezdesýler ótkizildi. Bilim berý uıymdarynda kez kelgen adam tazalyq bólmesi men ashananyń foto-vıdeosyn jibere alatyn messendjerlerdiń QR-kodtary bar býkletter taratyldy. Aktsııaǵa oqýshylar men ata-analar belsendi qatysty. Mektepter men olardy qarjylandyrý ákimdikterdiń quzyretinde bolǵandyqtan, bilim ordalarynyń sanıtarlyq-turmystyq jaǵdaıy men ashanalarynyń jaı-kúıine qatysty barlyq shaǵym ákimdikterge jiberildi. Olarǵa aktsııa kezinde anyqtalǵan kemshilikter men eskertýlerdi joıýǵa ýaqyt berildi. 1 qyrkúıekke, ıaǵnı jańa oqý jyly bastalǵanǵa deıin jiberilgen qateliktermen jumys isteýi kerek. Ákimdikter kemshilikterdi joıǵannan keıin Instagram-daǵy @balaga.laiyq paraqshasynda mektep ájethanalary men ashanalarynyń «deıingi jáne keıingi» fotolary men vıdeolary jarııalanady», - deıdi QR BǴM Balalardyń quqyqtaryn qorǵaý komıtetiniń tóraǵasy Esenǵazy Imanǵalıev.

Shaǵymdardyń basym bóliginde mektepterdegi sanıtarlyq-gıgıenalyq jaǵdaı, naqtyraq aıtqanda tazalyq quraldarynyń, jýynatyn bólmelerde qalqalardyń bolmaýy, dárethana kabınalaryndaǵy esikterdiń durys jumys istemeýi jáne basqa da kemshilikter kórsetilgen. Aýladaǵy mektep dárethanalary týraly 3 habarlama túsipti.

QR Bilim jáne ǵylym mınıstrligi Balalardyń quqyqtaryn qorǵaý komıteti mektep dárethanalary men ashanalaryna monıtorıng júrgizý boıynsha «Balaǵa laıyq» respýblıkalyq aktsııasyn bastaǵan bolatyn.

Aktsııanyń alǵashqy aptasynda eldegi 65 mekteptiń ashanasy men dárethanasynda kemshilik bary habarlanǵan edi.