11 jeltoqsanda Quryltaıda ekonomıkany tsıfrlandyrý jóninde tyńdaý ótedi
ASTANA. KAZINFORM — Quryltaıda «Tsıfrlandyrý jáne jasandy ıntellekt jyly aıasynda ekonomıkanyń naqty sektory salalaryn tsıfrlyq transformatsııalaý» taqyrybynda tyńdaý ótkizý úshin arnaıy komıssııa quryldy.
— Quryltaıdyń negizgi is-sharalar josparyna sáıkes, osy jyldyń 11 jeltoqsanynda Tsıfrlandyrý, ınnovatsııalar jáne ǵylym komıteti «Tsıfrlandyrý jáne jasandy ıntellekt jyly aıasynda ekonomıkanyń naqty sektory salalaryn tsıfrlyq transformatsııalaý» taqyrybynda tyńdaý ótkizýdi josparlap otyr. Іs-shara barysynda ónerkásip, qurylys, kólik, energetıka jáne aýyl sharýashylyǵy salalaryndaǵy ekonomıkany tsıfrlandyrýdyń qazirgi jaı-kúıi, ózekti máseleleri jáne olardy sheshý joldary talqylanady, — dedi depýtat Darhan Ahmedıev Quryltaıdyń jalpy otyrysynda.
Tyńdaýǵa Premer-mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıev, birqatar ortalyq memlekettik organnyń basshylary, salalyq qaýymdastyqtar men bıznes ókilderi, sondaı-aq táýelsiz sarapshylar qatysady.
Quryltaı reglamentiniń 211-tarmaǵyna sáıkes tyńdaý ótkizý jónindegi arnaıy komıssııa quryldy.
Onyń quramyna barlyq turaqty komıtet pen saıası partııalar fraktsııalarynyń atynan 19 depýtat endi. Komıssııa tóraǵasy bolyp Quryltaıdyń Tsıfrlandyrý, ınnovatsııalar jáne ǵylym komıtetiniń tóraǵasy Darhan Ahmedıev saılandy.
Aıta keteıik, Prezıdent Qasym-Jomart Toqaev Túrki memleketteri uıymynyń 13-sammıtinde tsıfrlandyrý men jasandy ıntellektini damytýdyń mańyzyn atap ótip, Qazaqstannyń osy baǵyttaǵy bastamalary men jetistikterine toqtaldy.
