11 jastaǵy Nurııa Súleımen sportta 80 medal jeńip alǵan
ASTANA. QazAqparat - «Bulaq kórseń - kózin ash» deıdi halqymyz. Elden erek týǵan jas talanttarymyz az emes, degenmen sonyń biregeıi - mánerlep syrǵanaýshy, sporttyq bal bıshisi - Nurııa Súleımen deýge ábden bolady. Elden erek týǵan talantty sportshy dodaǵa túskende aldyna jan salmaıdy eken. Nebári 11 jasynda-aq 80 medal ıelengen ol talaıdyń tańdaıyn qaqtyryp otyr. Óz jasyndaǵylardan bir bas ozyq týǵan Nurııa búginde mánerlep syrǵanaýdan Qazaqstannyń eki dúrkin chempıony, sporttyq bal bıinen álem jáne Eýropa birinshilikteriniń jeńimpazy atanyp otyr.
Qazir Nurııany sporttyq bal bıinen QR Ulttyq Keńesiniń vıtse-Prezıdenti, «Bomond» bal bı ansambliniń jetekshisi Vladıslav Lı jattyqtyrsa, Qazaqstannyń joǵary sanattaǵy jattyqtyrýshysy, Astana qalasynyń aǵa bapkeri Aleksandra Brejneva mánerlep syrǵanaýdan daıyndaýda.
Astananyń bir buryshynda osyndaı daryndy balanyń bar ekendigin bilgen soń, biz onyń ata-anasyna habarlasýdy jón kórdik.
«11 jasynda 80 medal jeńip aldy, sporttyq bal bıi boıynsha álem jáne Eýropa chempıony. Bıyl mánerlep syrǵanaýdan Qazaqstannyń eki dúrkin chempıony atandy. Sýret salady, dombyra tartady. Mánerlep syrǵanaýmen 4 jyldan beri aınalysýda. Basynda Oqýshylar saraıynda daıyndalyp júrgen edi, óz talantymen kózge túsip, Olımpıadalyq rezervke alyndy. Qazir Astanadaǵy «Alaý» muz saraıynda ulttyq komandada jattyǵýda. Baldyq bıdi qatar alyp júr. Eki sport birin-biri tolyqtyrady dep aıtsa da bolady. Sebebi baldyq bı Nurııanyń mánerlep syrǵanaýda óte joǵary deńgeıdegi horeografııalyq qabilet-qarymynyń damýyna septigin tıgizdi», - deıdi Nurııanyń ákesi Erlan Súleımen.
Sportqa degen yntasy erte jastan baıqaldy, deıdi ol. Qazir kún atqannan, kesh batqanǵa deıin jattyǵýdan qoly bosamaıdy eken.
«Tańǵy 07:00-den 11:00-ge deıin «Alaýda» mánerlep syrǵanaýdan jattyǵýlar ótedi, sodan keıin, 20:00-den 21:30-ǵa deıin sporttyq baldyq bıge qatysady. Jumasyna alty kún jattyǵý, onyń ústine sabaǵy bar, tek jeksenbi kúni demalady», - dep atap ótti Erlan QazAqparat tilshisine bergen suhbatynda.
Degenmen óz qatarynan bir bas ozyq týǵan Nurııanyń taǵdyry tasada qalyp kete me degen kúdik te joq emes.
«Kelesi jumada Máskeýge mánerlep syrǵanaýdan tanymal reseılik bapker Olga Dmıtrıevna Markovanyń mektebine oqýǵa barady. Endi úkimet tarapynan qoldaý bolsa deımiz. Bir mıllıon teńgesin óz qaltamyzdan tólep qoıdyq, alaıda jarystar ótedi, júrip-turýy bar, sol jaǵynan birshama qoldaý qajet. Ózim hımııa ǵylymdarynyń doktorymyn. Nurııa qyzym, árdaıym jarystarǵa shyǵyp, shetelde Qazaqstan namysyn sátti qorǵap júr. Qazaqstan qalalarynda, Túrkııa, Dýbaı (BAÁ), Grýzııa, Máskeýge, Sankt-Peterbýrgqa baryp, tek jeńis tuǵyrynan kórinip júr. Jarys bolǵan saıyn óz qaltamyzdan tólep kelemiz. Adam el kórip, jer kórip, ózgeler arqyly óziniń olqy tustaryn baıqap, kemshilikterin túzep, tájirıbe jınaqtasa - órkendeı túsedi. Osy jaǵynan alyp qaraǵanda, memleket tarapynan qoldaý bolsa deımiz. Jergilikti atqarýshy organdar tarapynan qoldaý tek respýblıkalyq jarystarda kórsetiledi. El ishindegi qalalarǵa barǵanda, jolyn, turatyn jerine qarajat qarastyrylady, degenmen kóp aqsha bóle almaıdy. Kómek joq dep aıta almaımyn. Biraq balanyń talantyn jan-jaqty shyńdaý úshin demeý qajet», - deıdi Erlan Súleımen.
Aıta ketý kerek, reseılik maman Olga Markova qazaqstandyq mánerlep syrǵanaýshy Abzal Rahymǵalıevtiń jeke bapkeri bolǵan. Qazir ol talantty jastardyń jańa tolqynyn tárbıelep shyqqan joǵary deńgeıli bapker sanalady.
Mánerlep syrǵanaý - elimizde kenje damyǵan sport túrleriniń biri. Degenmen sońǵy jyldary elimizde Elızabet Tursynbaeva, Jansaıa Adyhanova, Veronıka Sheveleva men Aıza Mambekova sııaqty sportshylarymyz úlken dodalarda Qazaqstandy tanyta bastady. Al Nurııa bolsa, olardyń ornyn basatyn jańa býyn ókili.
Sporttyń bul túri kez kelgen sportshylarǵa quryq saldyra bermeıtinin eskersek, qazaqtyń qarshadaı qyzynyń kórsetken jetistigi barsha Alash jurtynyń maqtanyshy ekeni anyq. Búginde bolashaǵynan zor úmit kúttirip, jas ta bolsa, jasyndaı jarqyrap kele jatqan Nurııa Súleımen keleshekte Álem jáne Eýropa birinshilikterinde atoı salyp, Olımpıada shyńyn alatynyna senim mol.
