11 jastaǵy qyzdarǵa papıllomavırýsqa qarsy vaktsına salynbaq
ASTANA. QazAqparat – Elimizde 11 jastaǵy qyzdarǵa adam papıllomavırýsyna qarsy vaktsına salý josparlanyp otyr. Bul týraly «Ashyq» NQA portalynda jarııalanǵan Onkologııalyq aýrýlarmen kúres jónindegi 2023-2025 jyldarǵa arnalǵan keshendi josparda jazylǵan, dep habarlaıdy QazAqparat tilshisi.
«11 jastaǵy jasóspirim qyzdardy adam papıllomavırýsyna qarsy vaktsınalaý uıymdastyrylady jáne júzege asyrylady. Ekpemen nysanaly toptyń keminde 95%-y qamtylady», - delingen qujatta.
Keshendi josparda kórsetilgendeı, vaktsınatsııa júrgiziletin merzim – 2023-2025 jyldar aralyǵy.
Sonymen qatar, atalǵan ýaqyt ishinde «V» vırýsty gepatıtine de qarsy vaktsınatsııa júrgizilmek. Bul baǵytta da nysanaly toptyń 95%-yn tıisti ekpemen qamtý josparlanǵan.
Qujatty ashyq talqylaý 23 aqpanǵa deıin jalǵasady.
