11 jastaǵy uldarǵa vaktsına salynady – Densaýlyqqa bólingen qarjy qaıda jumsalady
ASTANA. KAZINFORM – 2027 jyly Qazaqstanda densaýlyq saqtaý salasyna 2,5 trln teńge bólý kózdelgen. Bul qarajat tegin medıtsınalyq kómektiń kepildik berilgen kólemine, dári-dármekpen qamtamasyz etýge jáne medıtsınalyq saqtandyrýǵa kózdelgen. Bul týraly Qarjy vıtse-mınıstri Abzal Beısenbekuly málim etti.
Vıtse-mınıstrdiń aıtýynsha, salany qarjylandyrý ǵana emes, aýrýdyń aldyn alý sharalaryn qabyldaý, sondaı-aq densaýlyq salasynyń naqty kórsetkishterin jaqsartý mindeti qoıylyp otyr.
– Mysaly, 2027 jyldan bastap pılottyq rejımde 4 óńirde skrınıngtiń jańa túri, atap aıtqanda ókpe obyrynyń aldyn alý skrınıngi engiziletin bolady. Bul naýqastardy erterek anyqtaýǵa múmkindik beredi. Nemese aldyn alý sharasy retinde – 11 jastaǵy uldarǵa papılloma vırýsyna qarsy vaktsına salý bar. Qyzdarǵa bul vaktsına 2025 jyldan salyna bastaldy, – dedi A. Beısenbekuly Quryltaıda ótken bıýdjet tanystyrylymynda.
Áleýmettik kómektiń ataýlylyǵyn arttyrý boıynsha is-sharalar esebinen 702 mlrd teńge ońtaılandyryldy. Sondaı-aq áleýmettik tólemderdi ındeksteýge jáne týý men ómir súrý uzaqtyǵynyń ósýine baılanysty bıýdjetten qosymsha 739 mlrd teńge baǵyttalatyn bolady.
Densaýlyq saqtaý salasynda alǵashqy medıtsınalyq-sanıtarııalyq kómektiń MÁMS júıesine aýysýyna baılanysty 453 mlrd teńge qaıta bólindi.
– Al MÁMS-ke memleket jarnalaryn esepteý kezinde paıdalanylatyn medıandyq jalaqynyń ulǵaıýyna baılanysty qosymsha 185 mlrd teńge kózdeldi. Osylaısha, shyǵystar memlekettiń barlyq negizgi mindettemelerin saqtaıdy jáne halyqtyń osal toptaryn qorǵaıdy, – dep túsindirdi Qarjy vıtse-mınıstri.
Aıta keteıik, Qarjy vıtse-mınıstri Abzal Beısenbekuly Quryltaıda «2027-2029 jyldarǵa arnalǵan respýblıkalyq bıýdjet týraly» Zań jobasyn tanystyrdy.
Elimizde kelesi jyly áleýmettik kómekke 6,9 trln teńge bólinedi.
