11 jastaǵy qyz balalarǵa jatyr moıny obyryna qarsy vaktsına tegin salynady
ALMATY. KAZINFORM – Qazaqstanda qyrkúıekten bastap 11 jastaǵy qyzdarǵa jatyr moıny obyryna qarsy vaktsına salynady.
Almaty qalalyq densaýlyq saqtaý basqarmasy atap ótkendeı, Qazaqstanda 11 jasar qyzdarǵa adam papıllomavırýsyna qarsy vaktsına egý qolǵa alynbaqshy. Vaktsınany ata-ananyń jazbasha kelisimimen jańa oqý jylynyń basynda, ıaǵnı 2024 jyldyń kúzinde tegin salynady.
«Jatyr moıny obyrynyń 97%-y osy vırýspen baılanysty. Sozylmaly vırýs tasymaldaý belgili bir jaǵdaıda jatyr moıny obyrynyń damýyna ákelýi múmkin», - dep habarlady basqarmadan.
Almaty onkologııalyq ortalyǵynyń bólim meńgerýshisi Raıhan Bolatbekova jatyr moıny obyry birden-bir tolyq aldyn alýǵa bolatyn isik ekenin atap ótti.
«Jappaı ekpe alatyn turǵyndardyń negizgi bóligi — 9-13 jas aralyǵyndaǵy jasóspirim qyzdar. Bul kezeń qyzdardy jynystyq belsendiliktiń bastalýyna deıin jappaı egý maqsatynda tańdaldy. Eń durysy, áıel jynystyq belsendilikke kirispes buryn vaktsınany alýy kerek. Dúnıejúzilik densaýlyq saqtaý uıymy vaktsınany 26 jasqa deıin alýdy usynyp otyr. Adam papıllomavırýsyna qarsy vaktsına jatyr moıny obyrynyń aldyn alady», - deıdi maman.
Onkologtiń sózinshe, byltyr megapolıste jatyr moıny obyryna 223 turǵyn shaldyqqan. Almaty onkologııalyq ortalyǵynda barlyǵy 2522 áıel osy dıagnozben esepte tur.
