11 jastaǵy brıtandyq shahmatshy qyz áıelder arasyndaǵy eń jas grossmeıster atandy
ASTANA. KAZINFORM – Halyqaralyq shahmat federatsııasy (FIDE) rastaǵandaı, Sıvanandan grossmeıster ataǵyn alý úshin qajetti úsh normanyń sońǵysyn oryndady. Ol Ózbekstannyń Samarqand qalasynda ótken 46-shy Shahmat olımpıadasynda Anglııa quramasy sapynda óner kórsetti, – dep habarlaıdy Kazinform BBC-ge silteme jasap.
Soltústik-batys Londonnan shyqqan mektep oqýshysy buǵan deıin Ulybrıtanııanyń shahmattan eń jas chempıony atanyp, kez kelgen sport túrinen halyqaralyq jarystarda Anglııanyń atynan óner kórsetken eń jas sportshy bolǵan.
Samarqandta ótken olımpıadada Sıvanandan Anglııa quramasynyń birinshi taqtasynda barlyq 11 partııany oınady. Eń myqty qarsylastarmen oınaý mindeti ádette komandanyń negizgi oıynshysyna júkteledi. Sıvanandan týrnırdi 8 upaımen aıaqtady: 6 jeńis, 4 teń oıyn jáne 1 jeńilis.
Shahmatshy qyz buǵan deıin áıelder arasyndaǵy grossmeıster ataǵyn alý úshin qajetti 2300 reıtıngtik mejege jetken edi.
– Bul jetistikke qol jetkizgenime óte qýanyshtymyn. Biraq munymen toqtap qalmaı, alǵa umtylyp, jańa tarıhı jetistikterge qol jetkizgim keledi, — dedi ol FIDE-ge bergen suhbatynda.
– Maǵan saıahattaǵan unaıdy. Qazir mektepte tolyq kún oqıtyndyqtan, bul maǵan kóp kómektesedi. Óıtkeni saparlarym mekteptegi túrli jobalarǵa da paıdaly, — dep qosty shahmatshy qyz.
Buǵan deıin áıelder arasyndaǵy eń jas grossmeıster ataǵy Ekaterına Lagnoǵa tıesili bolǵan. Ol alǵashynda Ýkraına atynan óner kórsetip, keıin Reseı azamattyǵyn alyp, Reseı quramasy sapynda oınady. Lagno grossmeıster ataǵyn 12 jasynda alǵan.
Qytaılyq Hoý Ifan da áıelder arasyndaǵy grossmeıster ataǵyn 12 jasynda alǵan. Keıin 14 jasynda erlerge de, áıelderge de beriletin jalpy grossmeıster ataǵyn ıelenip, bul ataqty alǵan eń jas áıel atandy. Ol bul rekordty áli kúnge deıin saqtap keledi.
Eske sala keteıik, Shahmat Olımpıadasynda Qazaqstan altynshy jeńisine qol jetkizgeni habarlanǵan bolatyn.
