11 jasar qaraǵandylyq Bangkokta ústel tennısinen el namysyn qorǵaıdy
ASTANA. QazAqparat - Qaraǵandylyq 11 jasar Alan Qurmanǵalıev ústel tennısinen «Hopes Week» ortaazııalyq jarysyna qatysýǵa shaqyrtý aldy. Halyqaralyq týrnır Bangkokta 5-12 naýryz aralyǵynda ótedi, dep habarlaıdy QazAqparat Qaraǵandy oblysy ákimdiginiń baspasóz qyzmetine silteme jasap.
Alan Qurmanǵalıev Halyqaralyq ústel tennısi federatsııasynyń (ITTF) mamandarynyń nazaryna qańtar aıynda Tegerandaǵy jarysta ilikken bolatyn. Onda jas qaraǵandylyq «Hopes Week»-tiń irikteý týrnırine qatysqan edi. Onyń qarsylastary Qazaqstan, Ózbekstan, Qyrǵyzstan, Túrikmenstan, Tájikstan, Iran jáne Aýǵanstannan kelgen sportshylar boldy.
Alan óz jas sanatynda Qazaqstannyń absolıýtti chempıony. Ol bul mártebeni ótken jyly Almaty qalasynda ótken 2006 jyly týǵan jáne odan jas sportshylar arasyndaǵy el chempıonatynda jeńip aldy.
ITTF «Hopes Week» arqyly dúnıejúzi boıynsha daryndy balalardy anyqtap, olardy ári qaraı damytyp otyrady. «Regional Hopes Week & Challenge» aımaqtyq irikteý saıystarynda jeńimpazdar anyqtalyp, bir jyl boıy olar óz ustazdarymen birge ITTF esebinen 12 bedeldi týrnırlerge jáne barlyq halyqaralyq birlesken jıyndarǵa qatysady.
Alan Qurmanǵalıev - ústel tennısi boıynsha Qaraǵandy mamandandyrylǵan balalar-jasóspirimder olımpıada rezervi mektebiniń tárbıelenýshisi.
