11 jasar balaǵa kóligin júrgizýge bergen azamat aıyppul tóleıdi
TALDYQORǴAN. QazAqparat - Almaty oblysynyń Іshki ister basqarmasy 11 jastaǵy balasyna kólikti basqarýǵa bergen azamatty anyqtady, dep habarlaıdy QazAqparat tilshisi.
Eske salsaq, jaqynda «Almaty-Qapshaǵaı» tasjoly boıynda jasóspirim balanyń avtokólikti júrgizip bara jatqan vıdeosy áleýmettik jelige taralǵan bolatyn.
«Osyǵan oraı júrgizilgen arnaıy sharalar barysynda «Lada granta» avtokóliginiń ıesi anyqtaldy. Ol Іle aýdanynyń 41 jastaǵy turǵyny bolyp shyqty. 22 sáýirde jarııalanǵan vıdeoda «Almaty-Qapshaǵaı» tas jolynda atalǵan avtokóliktiń rýlinde 11 jastaǵy balanyń otyrǵany túsirilgen. Avtokólik ıesi rýlde otyrǵan balanyń áreketi óziniń baqylaýynda bolǵanyn, bala júrgizýshiniń aldynda otyrǵanyn aıtady. Degenmen, avtokólik ıesine úlken somada aıyppul salyndy», - delingen baspasóz baıanynda.
Aıta keterligi, polıtsııa QR Ákimshilik quqyqbuzýshylyq týraly kodekstiń 612-baby 5-bóligi boıynsha (kólik quralyn basqarý quqyǵy joq adamǵa berý) hattama toltyrǵan. Ol boıynsha 50 AEK mólsherinde aıyppul qarastyrylady.
