11 jasar Arýjan erligi úshin marapattaldy
ASTANA. QazAqparat - «Qazmedıa ortalyǵynyń» Kontsert zalynda 8 naýryz Halyqaralyq áıelder kúnine arnalǵan saltanatty is-shara kezinde ІІM TJ komıtetiniń ókilderi 11 jastaǵy Arýjandy marapattady.
Bul týraly QR ІІM TJ komıtetiniń Memlekettik til jáne aqparat basqarmasynan habarlady.
11 aqpanda Qyzylorda qalasynda oryn alǵan órt kezinde batyl qyz Arýjan óziniń eki inisi men kishi sińlisin aman alyp qalǵan.
Jasyna qaramastan, ol baýyrlaryna tereze arqyly shyǵýǵa kómektesip, eresekterdi kómekke shaqyrdy.
Batyr qyz tótenshe jaǵdaıda adam ómirin saqtap qalýda kórsetken erligi men janqııarlyǵy úshin QR Іshki ister mınıstrliginiń buıryǵymen «Tótenshe jaǵdaıdaǵy erligi úshin» tós belgisimen marapattaldy.
Arýjanǵa marapatty QR ІІM Tótenshe jaǵdaılar komıtetiniń Tótenshe jaǵdaılardy joıý basqarmasy bastyǵynyń orynbasary polkovnık A.D. Jumanov saltanatty túrde tapsyrdy.
Sondaı-aq, kesh barysynda eldiń damýyna ózindik úlesterin qosqan áıelderge túrli atalymdarda syılyqtar tabys etildi.
