11 jasar almatylyq Italııadaǵy baıqaýǵa qatysady
ALMATY. QazAqparat - 11 jastaǵy Almaty turǵyny Adelına Muhametjanova Ennıo Morrıkoneniń «Nella Fantasia» kompozııatsııasyn oryndap, «Festival & Contest» baıqaýynyń júldesine ıe boldy. Endi ol Italııada ótetin halyqaralyq baıqaýda baq synaıdy, dep habarlaıdy QazAqparat tilshisi.
«Festival & Contest» baıqaýynda áýezdi únimen kózge túsken almatylyq qyz «Festival & Contest» qaýymdastyǵynyń prezıdenti Krıstına Karochettıdiń qolynan shaqyrtý aldy.
Jas ánshi Open International Auditions 2020 akademııalyq vokal baıqaýynda baq synaıtyn boldy.
Dúbirli doda 2020 jyly 30-31 naýryzda Malatesta teatrynda ótedi.
«Jańadan bastap kele jatqan vokalıst úshin Open International Auditions baıqaýyna shaqyrtý alý - úlken mártebe. Kásibı sheberlerdiń pikirin tyńdaý, tájirıbesin túsiný, halyqaralyq deńgeıdegi pedagogtardyń aqylyna uıý óte úlken jetistik. Adelına klassıkalyq mýzykany jaqsy kóredi, baıqaýǵa tyńǵylyqty daıyndalamyz», - dedi qyzdyń anasy Naılıa Sýjenoa.
Adelına Muhametjanova - SanremoJunior 2018 baıqaýynyń laýreaty, Eleny Obraztsova baıqaýyndaǵy Nıkolaı Tsıskarıdzeniń arnaıy syılyǵynyń ıegeri.
