11 jasar Alına Kúlbaeva Italııadaǵy televızııalyq án baıqaýynyń fınalyna ótti

Álemniń daryndy jetkinshekteri táýekel etip, baq synaǵan konkýrstyń irikteý týry Italııanyń Skala qalasynda ótti. Ol atalmysh eldiń tanymal opera ánshisi Enrıke Korýzoǵa arnalǵan shyǵarmany oryndap, ónersúıer qaýymdy tánti etti. Qazylar alqasynyń biraýyzdy sheshimimen Alına baıqaýdyń aqtyq synyna joldama aldy. Sol ýaqytta qazaq qyzy shyrqaǵan án Italııanyń radıostantsııalary arqyly bir aı boıy taratyldy.

«Tanymal áýendi oryndaý bala úshin ońaı emes. Bizdiń talantty jetkinshekter halyqaralyq baıqaýlardyń shyńyn baǵyndyrsa, biz qýanymyz. Olardy maqtan etemiz. Alına – arpa ishindegi bir bıdaı. Eńbekqorlyǵyna tań qalamyz. Mýzyka dese, janyn beredi», - deıdi mýzykalyq kolledj dırektorynyń orynbasary Elvıra Kaşýk.

Al Alına Kúlbaeva baıqaýda báseke joǵary ekenin aıtady.

«Sahnaǵa shyqqanda boıymdaǵy qobaljý tez basylady. Ómirimdi ánsiz elestete almaımyn. Baıqaýda men sııaqty daryndylar kóp boldy. Dese de, olarǵa des bermeı, elimdi Eýropaǵa tanyttym. Bul men úshin úlken abyroı. Búginde álemge tanymal jerlesimiz Marııa Mýdrıakqa uqsaǵym keledi», - deıdi ol.

Kári qurlyqta ótken halyqaralyq baıqaý Alına baǵyndyrǵan belesterdiń biri ǵana. Ol jeti jasynan beri ondaǵan halyqaralyq konkýrsqa qatysqan. Dese de Italııada ótken baıqaýdyń orny bólek.

«Italıandyqtar – ánshi halyq. Baıqaýlarǵa kelgen balalarymyzdy kórgende qyzyǵa da, qyzǵana da qaraıtyny sondyqtan. Sebebi talantty jetkinshekter óte kóp. Qyzym sahnaǵa shyqqandaǵy sezimimdi sózben jetkizý múmkin emes. Alına «Pamıatı Korýzo» ánin tańdady. Bala úshin kúrdeli shyǵarmany ońaı emes», - deıdi oqýshy qyzdyń anasy Alınur Kúlbaeva.

25 jyldyq tarıhy bar baıqaýdyń aqtyq syny qazan aıynda ótedi. Baıraqty dodanyń talaby boıynsha ánder ıtalıan tilinde oryndalýy shart. Qazirgi ýaqytta Alına tyńǵylyqty daıyndyq ústinde. Shet tilin meńgerýdi de maqsat etedi.

Pavlodar mýzykalyq kolledji 60 jyl ishinde Qazaqstandy álemge tanymal ónerpazdardyń talaı tolqynyn ósirdi. Búginde oqý ornynan túlep ushqan jastar halyqaralyq sahnalarda qazaq eliniń namysyn abyroımen qorǵaýda.