11-synyp muǵalimderiniń jalaqysyn kóterýdi keıinge qaldyrmaý kerek - Májilis depýtattary
ASTANA. QazAqparat - Búgin Májilis depýtattary 11-synyp muǵalimderiniń jalaqysyn kóterý merzimin keıinge qaldyrýǵa narazylyq tanytty, dep habarlaıdy QazAqparat.
Májiliste «2018-2020 jyldarǵa arnalǵan respýblıkalyq bıýdjetti naqtylaý týraly» QR zańynyń jobasyn tanystyrǵan QR Qarjy mınıstri Baqyt Sultanovtyń aıtýynsha, muǵalimderdiń jalaqysyn kóterý úsh komponentten turady.
«Birinshiden, jańartylǵan mazmundaǵy baǵdarlamamen oqytatyn barlyq muǵalimderdiń laýazymdyq jalaqysyna 30 paıyz mólsherinde qosymsha aqy tólenbek. Ekinshiden, aǵymdaǵy jyldyń 1 qańtarynan bastap 1, 2, 5 jáne 7-synyptardyń muǵalimderi qosymsha aqy alatyn bolady. Úshinshiden, pedagogıkalyq sheberlik úshin jalaqysynan 30-dan 50 paıyzǵa deıin qosymsha aqy tólenedi», - dedi Baqyt Sultanov.
Osy rette depýtat Merýert Qazbekova 2018 jyldyń qańtarynan 1, 2, 5 jáne 7-synyptardyń muǵalimderi, al 11-synyp muǵalimderi 2020 jyldyń qańtarynan bastap qana qosymsha aqy alatyndyǵyn túsinbeıtindigin ashyq aıtty. «Olar neden aıypty bolyp qaldy? Qandaı ádis qoldanylǵan?», - dep surady osy jıynǵa qatysyp otyrǵan QR Bilim jáne ǵylym vıtse-mınıstri Bıbigúl Asylovadan.
Al vıtse-mınıstrdiń aıtýynsha, mundaı kezeń bilim berýdiń jańartylǵan mazmunyna kóshýge jáne muǵalimderge júktemeniń artýyna baılanysty eseptelingen. Máselen, 11-synyp muǵaliminiń júktemesi 1-synyp muǵalim júktemesine qaraǵanda birshama tómen.
«Qazirgi júktemege olar qoldanystaǵy qaýlymen bekitilgen jalaqyny alady», - dedi Bıbigúl Asylova.
Alaıda vıtse-mınıstrdiń jaýabyna qanaǵattanbaǵan depýtat barlyq muǵalim birdeı ýaqytta kóterme jalaqy alýy tıistigin basa aıtty. Al Bıbigúl Asylovanyń aıtýynsha, 2016 jyldyń 1 qańtarynan bastap muǵalimderdiń jalaqysy 29 paıyzǵa artqan.
«Barlyq muǵalimder atalǵan ústeme aqyny alady. Jańartylǵan mazmunǵa kóshýdiń kestesi bekitildi. Muǵalimder, soǵan sáıkes oqýshylarǵa da sondaı júkteme belgilengen. Sondyqtan da bul máseleni 2016-2017 jyldary mınıstrlik talqylap, bıýdjet múmkinshiligine qaraı osyndaı sharalarǵa toqtaldy. 11-synyp muǵalimderi eń aldymen úlken býyn sanalady. Pán muǵalimderine aǵylshyn tilinde sabaq júrgizgeni úshin ústemeaqy beriledi. Jalpy, muǵalimder qoǵamdastyǵy aldyn ala talqylaǵan kestemen kelisti», - dedi ol.
Degenmen otyrysqa tóraǵalyq etip otyrǵan Qarjy jáne bıýdjet komıtetiniń tóraıymy Gúljan Qaraǵusova Bilim jáne ǵylym vıtse-mınıstriniń jaýabyna qanaǵattanbaǵanyn atap ótti.
«Biz bazalyq laýazymdyq aılyq sanalatyn jalaqy bóliginiń ósimi jaıynda aıtyp otyrmyz. 29 paıyzdyq bazalyq laýazymdyq aılyqtyń ósýi jalaqyǵa qatysty emes. Jalaqy qurylymynda bul 29 paıyz joq. Menińshe, biz máseleni áli de kóteremiz. Biz ádistemeniń ózin ózgertpeıinshe osylaı kete beremiz: Prezıdent bir nárse tapsyrsa, biz ony qalaı bolsa solaı oryndaımyz», - dedi Gúljan Qaraǵusova.
