11 óńirde aýyl sharýashylyǵy daqyldaryn saqtandyrý baǵdarlamasy júzege asyrylyp jatyr
ASTANA. KAZINFORM – 2026 jylǵy egin egý maýsymyna arnalǵan aýyl sharýashylyǵy daqyldaryn qurǵaqshylyqtan saqtandyrý merzimi uzartyldy.
Jazdyq daqyldardy ylǵal tapshylyǵynan saqtandyrýǵa ótinim qabyldaý 2026 jyldyń 30 sáýirine deıin (qosa alǵanda) jalǵasady.
Bul shara elimizdiń 11 óńirindegi agrarlyq sektor ókilderin qamtıdy. Atap aıtqanda, baǵdarlama Aqmola, Aqtóbe, Atyraý, Shyǵys Qazaqstan, Batys Qazaqstan, Qaraǵandy, Qostanaı, Pavlodar, Soltústik Qazaqstan oblystarynda, sondaı-aq Abaı jáne Ulytaý oblystarynda júzege asyrylady.
Baǵdarlama aıasynda aýyl sharýashylyǵy taýaryn óndirýshiler dándi jáne maıly daqyldardy saqtandyrý múmkindigine ıe. Dándi daqyldar boıynsha úsh kezeńdi saqtandyrý 15 mamyr men 15 tamyz aralyǵyn, al eki kezeńdi saqtandyrý 15 maýsym men 15 tamyz aralyǵyn qamtıdy. Maıly daqyldar úshin úsh kezeńdi saqtandyrý merzimi 15 maýsymnan 14 qyrkúıekke deıin, al eki kezeńdi saqtandyrý 15 shildeden 14 qyrkúıekke deıin belgilengen.
Memleket tarapynan saqtandyrý júıesine qoldaý kórsetilip, saqtandyrý polısi qunynyń 80 paıyzy sýbsıdııalanady. Baǵdarlamany iske asyrý boıynsha tólemderdiń operatory – «Agrarlyq nesıe korporatsııasy».
Ótinimder Kezekte.kz portaly arqyly onlaın formatta qabyldanady. Saqtandyrý sharttaryn ýaqytyly rásimdeý agrarshylarǵa ósimdikterdiń vegetatsııalyq kezeńinde týyndaıtyn qolaısyz aýa raıy jaǵdaılaryna baılanysty qarjylyq táýekelderdi tómendetýge múmkindik beredi.
Aıta ketelik Qazaqstanda kómirtekti eginshilik topyraqty qalpyna keltirýdiń jańa baǵytyna aınalyp keledi.
