11 óńirde máslıhat depýtattarynyń saılaýy ótedi
ASTANA. 25 qyrkúıek. QazAqparat - Qazaqstan Respýblıkasynyń «Qazaqstan Respýblıkasyndaǵy saılaý týraly» Konstıtýtsııalyq zańynyń
101-baby 4-tarmaǵyna sáıkes, aǵymdaǵy jyldyń 28 qazanynda respýblıkanyń 11 óńirindegi 45 saılaý okrýginde máslıhattardyń shyǵyp qalǵan depýtattarynyń ornyna saılaý ótedi.
Máslıhattardyń shyǵyp qalǵan depýtattarynyń ornyna saılaýdy oblystyq saılaý komıssııalary taǵaıyndaıdy. Bul týraly QR Ortalyq saılaý komıssııasynyń baspasóz qyzmetinen habarlandy.
OSK habarlaýynsha, osy kúni barlyǵy oblystyq máslıhattardyń -10, qalalyq máslıhattardyń - 8 jáne aýdandyq máslıhattardyń - 27 depýtaty saılanatyn bolady.
«Qazaqstan Respýblıkasyndaǵy saılaý týraly» Konstıtýtsııalyq zańǵa sáıkes máslıhattar depýtattyǵyna kandıdattar usynýdy belgilengen tártip boıynsha tirkelgen respýblıkalyq nemese jergilikti qoǵamdyq birlestikter, sondaı-aq olardyń qurylymdyq bólimsheleri jáne ózin-ózi usyný jolymen azamattar júzege asyrady. Máslıhat depýtaty bolyp saılaný úshin azamat Konstıtýtsııanyń 86-babynyń 3-tarmaǵynda belgilengen talaptardy qanaǵattandyrýǵa, sondaı-aq Konstıtýtsııanyń 33-babynyń 2 jáne 3-tarmaqtaryna jáne osy Konstıtýtsııalyq zańǵa sáıkes saılaý quqyǵyna ıe bolýǵa tıis.
Osylaısha, Qazaqstan Respýblıkasynyń 20 jasqa tolǵan azamaty máslıhat depýtaty bolyp saılana alady. Sot is-áreketke qabiletsiz dep tanyǵan, sondaı-aq sot úkimi boıynsha bas bostandyǵynan aıyrý oryndarynda otyrǵan azamattardyń saılaýǵa jáne saılanýǵa quqyǵy joq», - delingen baspasóz habarlamasynda.
Sonymen qatar, respýblıkalyq nemese jergilikti qoǵamdyq birlestikterdiń, olardyń qurylymdyq bólimsheleriniń máslıhat depýtattyǵyna kandıdattar usynýyn, árbir kandıdat daýysqa túsetin saılaý okrýgin kórsete otyryp, olardyń joǵary organdary júrgizedi.
Azamattardyń máslıhat depýtattyǵyna kandıdattar usynýy ózin-ózi usyný tártibimen tıisti okrýgtik saılaý komıssııasyna osy aýmaqtyq saılaý okrýgi boıynsha máslıhat depýtattyǵyna kandıdat bolyp daýysqa túsý nıeti týraly ótinish berý jolymen júrgiziledi.
«Jalpy 2012 jylǵy 24 qyrkúıektegi jaǵdaı boıynsha, máslıhattar depýtattyǵyna kandıdat retinde 94 kandıdat usynylǵan. Olardyń 58-i - ózin-ózi usynǵandar», - delingen baspasóz aıǵaǵynda.
