11 myń gektar ormannyń janyp ketkeni úshin Jambyl sheneýnikteri jazaǵa tartyldy
TARAZ. QazAqparat - Jambyl oblystyq tabıǵı resýrstar jáne tabıǵatty paıdalanýdy retteý basqarmasynda memlekettik orman qorynyń aýmaǵyndaǵy órt qaýpi bar kezeńniń aldyn ala qorytyndylary talqylandy, dep habarlaıdy «QazAqparat» HAA tilshisi.
«Jambyl oblysy jer kóleminiń 30,8%-in memlekettik orman qorynyń aýmaǵy alyp jatyr, bul 4,4 mln gektar degen sóz»,- deıdi basqarma basshysy Serik Qoıbaqov. Onyń málimetterine qaraǵanda, órtke qarsy sharalarǵa bıyl oblystyq bıýdjetten 48,1 mln teńge bólingen. «Sáýir aıynan orman qorynyń 3,2 mln gektary áýeden baqylanyp otyrdy. Memlekettik orman qorynyń aýmaǵynda 50 órtke qarsy kúres toby jasaqtalyp, oǵan 400-den astam adam jumyldyryldy», - deıdi basqarma basshysy.
Jambyl oblysyndaǵy memlekettik orman qory aýmaǵynda jyl basynan beri tórt iri orman órti bolyp, 11,2 myń gektar alqapty qamtyǵan. «Orman órtiniń týyndaýyna jol bergeni úshin Qosqudyq, Julyn, Baızaq jáne Moıynqum memlekettik mekemeleriniń dırektorlaryna sógis jarııalandy», - dep málimdedi Jambyl oblystyq tabıǵı resýrstar jáne tabıǵatty paıdalanýdy retteý basqarmasynyń basshysy Serik Qoıbaqov.
