1,1 mlrd bereshek: Almaty oblysyndaǵy aýyldarǵa elektr energııasy qaıta beriletin boldy
QONAEV. KAZINFORM – Almaty oblysyndaǵy birqatar aýylda elektr energııasy jáne sýmen jabdyqtaý máselesi sheshildi.
Buǵan deıin Qarasaı aýdanynda kommýnaldyq tólemdi jınaıtyn kompanııanyń bereshegi bolǵandyqtan «Alataý Jaryq Kompanııasy» AQ birneshe aýyl men saıajaıda elektr energııasyn óshirip tastaǵan. Elektr qýatynyń óshirilýi saldarynan eldi mekenderdi aýyz sýmen qamtamasyz etetin sý alý uńǵymalary men sorǵy stantsııalarynyń jumysy toqtap qalǵan.
Oblys ákimdigi jekemenshik uıymnyń qaryzy saldarynan jaryq pen sýdan ajyratylǵan eldi mekenderge elektr energııasy qaıta berilgenin habarlady.
- Almaty oblysy ákimdigi men «Alataý Jaryq Kompanııasy» AQ arasynda júrgizilgen kelissózder nátıjesinde kommýnaldyq túıitkil sheshildi. Abonentterdiń jaryqtan ajyratylýyna jekelegen elektr jetkizýshi kompanııalardyń «AJK» aldyndaǵy qordalanǵan qaryzy sebep boldy. Eń iri bereshek – 1,1 mıllıard teńgeden astam qaryzy bar Qarasaı aýdanyndaǵy «BeyAzh Trans» JShS-ne tıesili, - dep habarlady ákimdikten.
Sondaı-aq oblys ákimidigi máseleniń saldaryn joıýmen ǵana shektelmeı, osyndaı jaǵdaılardyń qaıtalanýyna jol bermeý baǵytynda naqty sheshimder qabyldanǵanan málimdedi. Atap aıtqanda, «Asyl Arman», «Altyn Aýyl» jáne «Ómirzaq» turǵyn úı keshenderiniń elektr jelileri «Alataý Jaryq Kompanııasy» AQ-nyń senimgerlik basqarýyna berildi. Endi tutynýshylar úshin jeke derbes shottar ashylyp, elektr energııasy úshin tólemderdi deldalsyz, tikeleı tóleý múmkindigi qamtamasyz etiledi.
- Sonymen qatar Qarasaı aýdany ákiminiń ókimimen sýmen jabdyqtaý júıeleri «Taýsamaly qyzmet» MKK balansyna berildi. «BeyAzh Trans» JShS-nyń bereshegi zańnamada belgilengen tártippen kásiporyn múlkin óndirip alý jáne satý esebinen óteletin bolady, - delingen resmı málimdemede.
Eske salaıyq, óńir aýyldarynda jaryq pen sý óshýine baılanysty turǵyndar narazylyqqa shyǵyp, beıneúndeý jasaǵan bolatyn. Keıin atalǵan jaǵdaıǵa baılanysty oblys ákimi túsinikteme berdi. Sondaı-aq Qarasaı aýdany ákimine sógis jarııalanyp, ózge de jaýapty tulǵalardy jaýapqa tartý máselesi qaralyp jatqany habarlandy.
