1,1 mln-nan asa ata-ana pedagogıkalyq qoldaý kórsetý ortalyqtarynyń kómegine júgindi
ASTANA. KAZINFORM — Oqý jyly bastalǵaly beri pedagogıkalyq qoldaý ortalyqtary 33 myńnan astam sabaq ótkizip, oǵan 1,1 mıllıonnan astam ata-anany tartty, dep habarlaıdy Oqý-aǵartý mınıstrliginiń baspasóz qyzmeti.
Qazaqstanda ata-analarǵa pedagogıkalyq qoldaý ortalyqtarynyń 3.0 baǵdarlamasy jalǵasyp jatyr. Baǵdarlamanyń maqsaty — sanaly ata-ana bolý daǵdylaryn damytý jáne mektep pen otbasy arasyndaǵy ózara baılanysty nyǵaıtý.
— Ata-ana bala ómiriniń bir bóligine aınalǵanda, bala qoldaý men senimdilikti sezinedi. Osyndaı senimdi qarym-qatynastan emotsıonaldy jaǵynan turaqty, baqytty bala jáne úılesimdi otbasy qalyptasady, — dep atap ótti «Órken» KeAQ prezıdenti Elena Sakenova.
Ata-analarǵa arnaıy daıyndyqtan ótken pedagogter men psıhologtar dáris beredi.
Qazaqstandyq shańyraqtar arasynda eń kóp suranysqa ıe taqyryptar — «Tárbıeleý — jeke úlgi arqyly» jáne «Balalardyń qaýipsizdigi — eresekterdiń qamqorlyǵy». Bul sabaqtarda ata-analar senimdi nyǵaıtý, balamen emotsıonaldy baılanys ornatý jáne táýekelderdiń aldyn alý boıynsha paıdaly keńester alady.
Saýalnama nátıjeleri ata-analardyń balalarymen qarym-qatynasynyń jaqsarǵanyn kórsetip otyr. Zertteý suraqtaryna jaýap bergen ata-analardyń 72,6% balalarymen kúnde sóılese bastaǵanyn, 89,6% qıyndyqtarǵa der kezinde jaýap berip úırengenin, 78% balanyń ortasyn jaqsy tanı bastaǵanyn alǵa tartyp otyr. Árbir ekinshi ata-ana tárbıeleý tásilin qaıta qaraýǵa daıyn, al shamamen úshten biri balalardyń oqý jáne mádenı damýyna belsendi qatysa bastaǵanyn aıtady.
Aıta keteıik, ata-analarǵa pedagogıkalyq qoldaý ortalyqtary 2023 jyly «Adal Azamat» baǵdarlamasy aıasynda eldegi barlyq mektepterde iske qosyldy. Ortalyq ata-analardy qoldaý maqsatynda balany tárbıeleý men damytýǵa baǵyttalǵan praktıkalyq quraldardy usynady.
Budan buryn elimizde 23 myńnan astam pedagog tárbıe baǵdarlamasy aıasynda kásibı daıyndyqtan ótkeni belgili boldy.