11 mamyrda Almaty men Nur-Sultannan elimizdiń 7 qalasyna áýe qatynasy jandanady
NUR-SULTAN. QazAqparat – 11 mamyrda Nursultan men Almaty qalalarynan Qaraǵandy, Aqtóbe, Pavlodar, Qostanaı, Kókshetaý, Taraz, Taldyqorǵan qalalaryna áýe qatynastary jandanady. Osy oraıda tıisti qaýlyǵa Kóliktegi bas sanıtarlyq dárigeri Sádýaqas Baıǵabylov qol qoıdy, dep habarlaıdy QazAqparat.
Osy oraıda áýe kompanııalary basshylaryna tıisti mindetter júktelgen.
«COVID-19 testinen jáne jeke qorǵaný quraldarynan ótkeni týraly anyqtama (berilgen kúnnen bastap 14 kún, PTR -zertteý) bolǵan jaǵdaıda qyzmetkerlerdi jumysqa jiberýdi; dene temperatýrasyn ólsheı otyryp, qyzmetkerlerdiń aýysym aldyndaǵy medıtsınalyq tekserýden ótkizýdi; COVID-19 testinen ótkeni týraly anyqtama bolǵan kezde ǵana jolaýshylardy tirkeýdi jáne otyrǵyzýdy (anyqtamanyń qoldanylý merzimi berilgen kúnnen bastap 7 kún, PTR-zertteý); áýe kemesinen tirkeýden, otyrǵyzýdan jáne túsirýden ótý kezinde jolaýshylar arasyndaǵy qaýipsiz qashyqtyqty saqtaýdy (1 metr) qamtamasyz etýi kerek», - delingen qaýlyda.
Budan bólek, áýejaıdan ushyp shyqqan kezde Nur-Sultan, Almaty, Aqtóbe, Qaraǵandy, Qostanaı, Kókshetaý, Taraz, Taldyqorǵan jáne Pavlodar qalalarynyń áýejaı basshylary COVID-19 testinen ótkeni týraly anyqtama jáne jeke qorǵaný quraldary bolǵan jaǵdaıda qyzmetkerlerdi jumysqa jiberilýin, jolaýshylar arasyndaǵy qaýipsiz araqashyqtyqtyń saqtalýyn qamtamasyz etýi kerek. Sonymen qatar, áýejaılarǵa ózge de tıisti talaptardy oryndaý júktelip otyr.
Eske sala ketsek, 4 mamyrdan bastap Nur-Sultan men Almatydan Qyzylordaǵa, Petropavlǵa, Óskemenge jáne Semeıge áýe qatynastary qaıta jandandy.
