11 mamyr. QazAqparat: Ataýly kúnder, oqıǵalar, esimder
Dúnıejúzilik ádil saýda kúni
Jyl saıyn mamyrdyń ekinshi senbisinde atap ótiledi, al mamyr aıy ádil saýda aıy sanalady. Dúnıejúzilik saýda uıymynyń bastamasymen bekitilgen osy kúni 70 eldiń uıymdary ózderiniń ádil saýdaǵa tilektestikterin bildiredi. Ádil saýda - markalanǵan jáne markalanbaǵan taýarlarǵa qatysty qoǵamdyq saıasat pen halyqaralyq standarttardy saqtaýǵa shaqyratyn qoǵamdyq qozǵalys. Negizinen damýshy elderden damyǵan elderge eksporttalatyn taýarlarǵa basa nazar aýdarylady.
Dúnıejúzilik qustar kúni
Ár jyly mamyrdyń ekinshi senbi, jeksenbisi atap ótiledi. Buǵan 1906 jylǵy Qustardy qorǵaý halyqaralyq konventsııasyna qol qoıý sebep boldy.
Astronomııa kúni
Jylyna eki ret - kóktemde jáne kúzde atalyp ótiledi. Bul mereke kásiptik qyzmetteri astronomııamen, aspan denelerin baqylaýmen baılanysty adamdardy biriktiretin mereke.
Bul mereke 1973 jyly Amerıkada dúnıege kelip, astronomııa jankúıerlerin «Astronomııany adamzatqa tanystyrýshylar» uranynyń aınalasyna uıystyrdy. Búginde bul qozǵalysty Astronomııa lıgasy, Tynyq muhıt Astronomııalyq qoǵamy, Halyqaralyq Planetarııler odaǵy basqarady. Astronomııa kúnin ádette senbi kúni, aı ortalanyp, sáýir aıaqtalyp, mamyr bastaý alar kezde toılaıdy. Bul kúni kóptegen elderde myńdaǵan astronomııalyq klýbtar, ǵylymı murajaılar, planetarııler ártúrli qyzyqty sharalar uıymdastyryp, kópshilikke dárister oqıdy, telekonferentsııa, birikken jobalar jasap, juldyzdy aspandy teleskoptarmen tamashalatady.
ESTE QALAR OQIǴALAR
1996 jyly Iran Islam Respýblıkasy men Qazaqstan Respýblıkasynyń Prezıdentteri eki el arasyndaǵy yntymaqtastyqty odan ári damytý jáne tereńdetý týraly birlesken deklaratsııaǵa, Kaspıı teńiziniń máseleleri boıynsha birlesken málimdemege qol qoıdy.
1998 jyly Qazaqstan Respýblıkasynyń ishki ister organdary júıesinde «Arlan» arnaıy maqsattaǵy bólimshesi quryldy.
2006 jyly K.Baıseıitova atyndaǵy ulttyq opera jáne balet teatrynyń kameralyq hory bas hormeıster Erjan Dáýitovtiń basshylyǵymen XXV Halyqaralyq shirkeý mýzykalary festıvalinde birinshi oryn aldy. 26 elden kelgen ujymdar qatysqan festıval Polshanyń Belostok qalasynda ótti.
2007 jyly Muhtar Áýezovtiń murajaı úıinde halyqaralyq quqyqtanýshy Reın Mıýllersonnyń «Ortalyq Azııa» atty kitabynyń tanystyrylymy ótti. Kitapta avtordyń Ortalyq Azııadaǵy BUU-nyń aımaqtyq keńesshisi retinde qyzmet etken kezdegi aımaqtyń tanymal saıasatkerlerimen jeke kezdesýleri týraly materıaldar jáne qarapaıym halyqtyń tirshiligi jónindegi kózqarasy jınalǵan.
R.Mıýllerson - London ýnıversıtetiniń Korol kolledjiniń professory, halyqaralyq jáne álem qaýipsizdigi baǵdarlamasynyń dırektory. 80-jyldardyń aıaǵynda Estonııanyń syrtqy ister mınıstrliginiń orynbasary bolyp qyzmet atqarǵan. SSSR Prezıdenti Mıhaıl Gorbachevtiń keńesshisi bolǵan. Halyqaralyq quqyq jáne saıasat boıynsha 9 kitaptyń jáne 200-deı maqalanyń avtory.
2010 jyly L.N.Gýmılev atyndaǵy Eýrazııa ulttyq ýnıversıtetinde Ázerbaıjannyń burynǵy prezıdenti Geıdar Alıev atyndaǵy kabınet ashyldy.
2012 jyly Qazaqstanda Mýzeı aptasy jarııalandy. Osy kezeńde memlekettik mýzeıler óz esigin barlyq kelýshiler úshin aıqara ashty. Kórermender nazaryna kóptegen jańa jádigerler usynyldy. Sondaı-aq, apta aıasynda taqyryptyq dárister, ekskýrsııalar, ǵylymı oqylymdar, mýzeı-teatrlyq qoıylymdar ótkizildi.
2013 jyly Qazaqstan Prezıdenti Nursultan Nazarbaev pen Túrikmenstan Prezıdenti Gýrbanǵuly Berdimuhamedov «Bolashaq stansasy (Qazaqstan Respýblıkasy) - Serhetıaka stansasy (Túrkimenstan)» ótkeli arqyly elder arasyndaǵy tikeleı temirjol qatynasyn ashýǵa qatysty. «Bolashaq-Serhetıaka» ýchaskesi - Qazaqstan, Túrikmenstan jáne Iran arasyn jalǵastyratyn transulttyq dálizdiń bóligi.
2015 jyly Dýbaıda «Urpaqpen asyl baılanys» qazaq ulttyq buıymdarynyń biregeı kórmesi ashyldy. Kórmede dástúrli qazaq kıimderi men ulttyq stıldegi zamanaýı kıimder, zergerlik buıymdar usynyldy.
2016 jyly Qazaqstannyń Ulybrıtanııadaǵy Elshisi Erjan Qazyhanov belgili brıtandyq sáýletshi Norman Fosterge Qazaqstan Respýblıkasynyń Tuńǵysh Prezıdenti - Elbasy Nursultan Nazarbaevtyń beıbitshilik jáne progress Memlekettik syılyǵyn tabystady.
Norman Foster - brıtandyq sáýletshi, Imperator jáne Prıttsker syılyqtarynyń ıegeri. Ol Astana qalasyndaǵy «Beıbitshilik jáne kelisim saraıy» (2006), «Han-Shatyr» saýda,oıyn-saýyq ortalyǵy (2010) jáne QR Tuńǵysh Prezıdenti kitaphanasy ǵımarattarynyń avtory.
2017 jyly Astanadaǵy barlyq ǵımarattarǵa ındıvıdýaldy QR-kod berildi. Bul jańalyq jedel qyzmet, taksı júrgizýshileri, kýrerler men poshta qyzmetkerleriniń jumysyn aıtarlyqtaı jeńildetedi.
2017 jyly Qazaqstanda «Men - qazaqpyn», halyqaralyq mýzykalyq jobasy bastaldy. Ol qazaq mádenıetin ári qaraı dáripteýge baǵyttalǵan.
2018 jyly Tashkentte Halyqaralyq Túrki akademııasy Maǵjan Jumabaevtyń ózbek tilindegi shyǵarmalar jınaǵyn tanystyrdy. Jınaqty Mýzaffar Ahmad aýdaryp shyqty.
2018 jyly Italııanyń Pezaro qalasynda soprano ánshisi, «Astana Opera» teatrynyń solısi, «Qurmet» ordeniniń ıegeri, Halyqaralyq baıqaýlardyń laýreaty Aızada Qaponova XV halyqaralyq Dj. Rossını konkýrsynda birinshi oryndy jeńip aldy.