11 mamyrda elimizde 1–6 gradýsqa deıin úsik bolýy múmkin
ASTANA. KAZINFORM — «Qazgıdromet» RMK sınoptıkteri 9-11 mamyrǵa arnalǵan aýa raıy boljamyn usyndy.
Qazaqstan aýmaǵynyń basym bóliginde atmosferalyq frontaldy bólimderdiń ótýine baılanysty aýa raıynyń turaqsyz sıpaty saqtalady — jańbyr jaýyp, naızaǵaı kútiledi.
— 9 mamyrda eldiń ońtústik-batysynda, soltústik-batysynda jáne soltústiginde, al 10–11 mamyr kúnderi shyǵys, ońtústik jáne ońtústik-shyǵys óńirlerde qatty jańbyr jaýýy yqtımal. Keı jerlerde burshaq túsip, ekpindi jel soǵýy múmkin. Respýblıka boıynsha jeldiń kúsheıýi kútiledi, ońtústik óńirlerde shańdy daýyldar boljanady. Túngi jáne tańerteńgi saǵattarda tuman túsýi yqtımal, — delingen habarlamada.
Sınoptıkter boljamynsha, el aýmaǵynda aýa temperatýrasynyń birtindep tómendeýi kútiledi. 11 mamyrda respýblıkanyń soltústik jartysynda túngi ýaqytta 1–6 gradýsqa deıin úsik bolýy múmkin.
Kúndizgi aýa temperatýrasy:
batysta +13…+28°S,
soltústik-batysta +10…+18°S,
soltústikte +5…+13°S,
ortalyqta jáne shyǵysta +8…+18°S,
ońtústikte +17…+26°S,
ońtústik-shyǵysta +15…+22°S,
taýly aýdandarda +8…+13°S bolady dep kútiledi.
Osyǵan deıin «Qazgıdromet» RMK elimizdegi aýa sapasyna qatysty boljamyn jarııalaǵanyn jazdyq.
