11 qyrkúıektegi teraktide aman qalǵan AQSh azamaty Kenııadaǵy shabýyl kezinde qaza tapty
ASTANA. QazAqparat - 11 qyrkúıekte Dúnıejúzilik saýda ortalyǵy munarasyna jasalǵan lańkestik shabýyl kezinde tiri qalǵan AQSh kásipkeri 16 qańtarda Kenııada Naırobı qalasyndaǵy Dusit qonaqúı bıznes-keshenindegi terakti saldarynan qaza tapty. Bul týraly Sky News Arabia telearnasy habarlady.
Sodyrlar seısenbi kúni Dusit keshenine shabýyl jasaǵan. Alǵashqyda onda birneshe jarylys bolǵan, keıin sodyrlar adamdarǵa oq jaýdyrǵan. Sońynan jankeshti ǵımarattardyń birinde ózin jaryp jiberdi. Terrorısterdi ustaý operatsııasy 20 saǵatqa sozylǵan. 20-dan astam adam qaza tapty.
Djeıson Spındler ınvestıtsııalaý jáne damýshy naryqqa kómek kórsetetin konsaltıngtik kompanııany basqarǵan. Qandy oqıǵa bolǵan sátte onyń Dusit qonaqúıinde iskerlik kezdesýi ótip jatqan. Djeıson bir aptadan keıin 41 jasqa aıaq basar edi.
