11 kúnde dári-dármekter men medıtsınalyq buıymdardy satýda 396 quqyqbuzýshylyq anyqtaldy
Naýqastar sanynyń kúrt artýy kezinde qajetti dári-dármekterdiń tapshylyǵy elimizdiń ulttyq qaýipsizdigi júıesine aıtarlyqtaı qaýip tóndirdi. Bireýler úshin bul aýrý – qajetti dárilerdi taba almaý jáne jaqyndarynan aıyrylý bolsa, endi bireýleri úshin óz otandastarynyń esebinen baıý kózine aınaldy. Áleýmettik jelilerde Tótenshe jaǵdaı kezinde Qazaqstanǵa kelgen gýmanıtarlyq kómektiń dárihanalarda satylýy týraly aqparat, sondaı-aq dári-dármekterdiń qoldan jasalǵan tapshylyǵy jáne olardyń birshama joǵary baǵamen satylyp jatqany jóninde habarlamalar tarala bastady.
Árıne, mundaı jaǵdaı Memleket basshysynyń nazarynan tys qalmady.
- Qazir biz soǵys jaǵdaıyndamyz. Sondyqtan árbir basshydan shuǵyl máseleler men mindetterdi barynsha tıimdi sheshý talap etiledi, - dedi Qasym-Jomart Toqaev.
Prezıdent quqyq qorǵaý organdary qurylymdarynyń da naqty sheshimder qabyldap, áreket etýin talap etti. Dári-dármekter men medıtsınalyq buıymdardyń aınalymyn baqylaý QR Prezıdenti Ákimshiligine qarasty Qaýipsizdik Keńesiniń apparatyna júkteldi.
Kóp keshikpeı, búkil elimizde Densaýlyq saqtaý mınıstriniń dári-dármekterdiń bólshek saýdasynyń shekti baǵasy týraly buıryǵynyń talaptaryn saqtaý boıynsha farmatsevtıkalyq uıymdardyń jumysyn tekserý bastaldy. Baǵanyń qymbattaýynan bólek, qazirgi ýaqytta dári-dármekterdi zańsyz satý, ıaǵnı tirkeýsiz, lıtsenzııasyz jáne basqa da ruqsat qujattarynsyz, sonyń ishinde dárihanalar, áleýmettik jeliler men messendjerler arqyly satý derekteri anyqtalýda.
5 shildeden 16 shildege deıin 11 kún ishinde Qarjy mınıstrliginiń Ekonomıkalyq tekserý qyzmeti, Іshki ister mınıstrligi jáne Ulttyq qaýipsizdik komıtetiniń Shekara qyzmeti dári-dármekter satý jáne medıtsınalyq buıymdar salasy boıynsha 396 quqyq buzýshylyq faktilerin anyqtady. Onyń ishinde 76 is Qylmystyq kodekstiń babtary boıynsha qaralady. Atap aıtqanda jeke tulǵalardyń alyp-satý derekteri, dárihanalar jelisiniń qyzmetkerlerimen kelise otyryp jasalǵan birqatar áreketter.
Alynǵan dári-dármekterdiń bári Densaýlyq saqtaý mınıstrligine qarasty Taýarlardyń jáne kórsetiletin qyzmetterdiń sapasy men qaýipsizdigin baqylaý komıtetine naýqastardy emdeýge paıdalaný úshin beriledi.
Qazirgi ýaqytta Sybaılas jemqorlyqqa qarsy is-qımyl agenttigi «Medıtsınalyq saqtandyrý qory» kommertsııalyq emes aktsıonerlik qoǵamynyń laýazymdy tulǵalarynyń bıýdjet qarjysyn jymqyrý, jekelegen tulǵalardyń iri kólemde medıtsınalyq betperdelerdi satý, sondaı-aq, medıtsına mekemeleriniń jekelegen basshylarynyń asa iri kólemde bıýdjet qarjysyn jymqyrýǵa tyrysý derekteri boıynsha úsh qylmystyq isti tekserip jatyr.
Qarjy mınıstrliginiń Ekonomıkalyq tekserý qyzmeti koronavırýspen kúreske bólingen asa iri kólemdegi memlekettik qarjyny alaıaqtyq jolmen jymqyrý deregi boıynsha qylmystyq isti tekserýde.
Sonymen qatar Qaýipsizdik Keńesiniń apparaty men Prezıdent Ákimshiliginiń usynysy boıynsha quqyq qorǵaý organdary koronavırýs indetimen kúreske baǵyttalǵan sheteldik gýmanıtarlyq kómektiń maqsatty jáne ashyq jumsalýyna tekserý júrgizýdi bastady.
Dári-dármekterdi jasyrý jolyn kesý, baǵa kelisimi, gýmanıtarlyq kómek retinde kelgen nemese emdeý mekemelerinen urlanǵan dári-dármekterdi qaıta satý sııaqty áreketterdiń aldyn alý sharalary jalǵasýda.
