11 ken orny munaı óndirýdi ulǵaıtatyn jańa tehnologııalardy synaý úshin tańdaldy
ASTANA. KAZINFORM — Búgin Astanada Qazaqstan Respýblıkasy Energetıka mınıstrliginiń qoldaýymen Munaı bergishtigin arttyrý ádisteri (MBA) jónindegi Qazaqstan forýmy óz jumysyn bastady. Bul týraly vedomstvonyń baspasóz qyzmeti málim etti.
Іs-shara memlekettik organdardyń, munaı-gaz kompanııalarynyń, ǵylymı jáne servıstik uıymdardyń ókilderin, sondaı-aq halyqaralyq sarapshylardy biriktirdi. Forýmǵa KAZENERGY, «QazMunaıGaz» UK» AQ, «QMG Injınırıng» JShS, NCOC, Teńizshevroıl, KPO, jetekshi sheteldik kompanııalar men ýnıversıtetterdiń ókilderi qatysty.
Forým Qazaqstanda munaı bergishtigin arttyrý ádisterin engizý boıynsha praktıkalyq sheshimder ázirleýge baǵyttalǵan. Bul mindet ıgerýdiń sońǵy kezeńindegi iri ken oryndary úshin aıryqsha ózekti.
Іs-sharaǵa Qazaqstan Respýblıkasynyń Kómirsýtek ken oryndaryn barlaý jáne ıgerý jónindegi ortalyq komıssııasynyń 30 jyldyǵy erekshe mán berip otyr. Komıssııa jer qoınaýyn utymdy ári keshendi paıdalanýdy qamtamasyz etýde mańyzdy ról atqarady.
— Bul talqylaýlardyń nátıjesi tek pikirler men usynymdarmen shektelmeı, keıinnen naqty jobalardy baǵalaý jáne daıyndaý kezinde qoldanýǵa bolatyn sala úshin neǵurlym túsinikti ári biryńǵaı tásilderge ulasýy mańyzdy, — dep atap ótti forýmnyń alǵashqy jumys kúnin ashqan QR Energetıka vıtse-mınıstri Erlan Aqbarov.
Forým jumysy segiz strategııalyq sessııadan bastaldy. Qatysýshylar MBA tehnologııalaryn baǵalaý, modeldeý, zerthanalyq zertteýler, kásipshilik monıtorıng, yntalandyrý sharalary, ınfraqurylymdy damytý, sondaı-aq jabdyqtar men hımııalyq reagentter óndirisin oqshaýlaý máselelerin talqylaýda.
Talqylaýlardyń praktıkalyq jalǵasy MBA boıynsha Hakaton bolmaq. Sarapshylar 11 ken orny mysalynda tehnologııalarǵa ekspress-skrınıng júrgizip, 2027–2030 jyldary odan ári ǵylymı-ınjenerlik pysyqtaý jáne tájirıbelik-ónerkásiptik synaqtar ótkizý úshin basym sheshimderdi aıqyndaıdy.
Kelesi kúnderi munaı bergishtigin arttyrýdyń gazdyq, hımııalyq, termııalyq jáne aralas ádisterine, polımerlik sýlandyrýǵa, tsıfrlyq modeldeýge jáne qıyn óndiriletin qorlardy ıgerýge arnalǵan paneldik, plenarlyq jáne tehnıkalyq sessııalar ótedi.
Energetıka mınıstrliginiń dóńgelek ústeli aıasynda Astana deklaratsııasynyń jobasy jáne 2027–2030 jyldarǵa arnalǵan munaı bergishtigin arttyrý ádisterin damytý jáne engizý jónindegi Jol kartasy tanystyrylady. Forým qorytyndysy boıynsha Qazaqstan ken oryndarynda basym tehnologııalar men olardy praktıkalyq qoldaný sharalaryn aıqyndaıtyn qujattarǵa qol qoıý josparlanǵan.
Eske sala keteıik, jaqynda Energetıka mınıstri Erlan Aqkenjenov Qazaqstan munaı ónimderiniń eksportyn eki ese arttyratynyn málimdedi.
