11 qarashadan bastap «Qazaqstan» ulttyq telearnasy sheteldik serıaldardy kórsetýdi qysqartady
ASTANA. 4 qarasha. QazAqparat - 2013 jyldyń 11 qarashasynan «Qazaqstan» ulttyq telearnasynyń habar taratýy ózgeredi.
Eldiń basty ulttyq telearnasy tól serıaldaryn kórsetý kólemin ulǵaıtý maqsatynda sheteldik serıaldardy áldeqaıda qysqartady.
Tól baǵdarlamalar men serıaldardy kóbeıtý - álemdik trend. «Qazaqstan» telearnasynyń basshylyǵy otandyq teleserıaldardy kóbeıtip, tól ónimder kontentiniń sapasyn kóterýdi kózdep otyr.
Atalǵan arnanyń tuńǵysh tól serıaly 2009 jyly 6 serııadan turatyn «Aǵaıyndy» degen ataýmen jaryqqa shyqty. Odan keıingi jyldary «Qazaqstan» telearnasy ózderi shyǵarǵan serıaldar úlesin arttyrdy. Máselen, 2010 jyly ekranǵa taǵy eki serıal shyqty, 2011 jyly - 7 serıal, 2012 jyly telearna bul kórsetkishti eki ese ulǵaıtyp, qorytyndysynda olardyń sanyn 14-ke jetkizdi. Bıylǵy jyly «Qazaqstan» UTA óz kórermenderin «Týǵan eldiń tútini», «Paryz», «Kók tarlandary» jáne sońǵy shyqqan jańa týyndylar «Uljan» jáne «Olımp shyńy» serıaldarymen qýantty. Osylaısha, «Qazaqstan» UTA beıneqorynda barlyǵy 624 serııaly 32 serıal bar.
2013 jyldyń qyrkúıek aıynda tusaýy kesilgen jańa serıaldardyń kórsetilýi otandyq ónimderge degen suranystyń óte joǵary ekendigin kórsetti. TNS Gallup Media Asia keltirgen málimetter boıynsha, 2013 jyly Qazaqstan telenaryǵyndaǵy telehıkaıa kórsetý boıynsha tizimdegi 15 týyndynyń ishinde «Qazaqstan» UTA-nyń «Uljan» serıaly úshinshi orynnan kórindi. Otandyq ónimdegi jobalardyń reıtıngisiniń artýyn eskere otyryp, 2013 jyldyń maýsymynan Qazaqstan telearnasy sheteldik serıaldardy kórsetýdi qysqartty. 2013 jyly sheteldik serıaldardyń ortasha táýliktik kólemi táýligine «Qazaqstan» telearnasynyń jalpy táýliktik habar taratýynyń 4 saǵatyn qurady. 2013 jyldyń 11 qarashasynan bastap, sheteldik ónimdegi serıaldar kólemin táýligine 1 saǵat 40 mınýtqa deıin, ıaǵnı, jalpy habar taratýdan 7 paıyzǵa deıin qysqartytylady. Bul «Qazaqstan» telearnasynda efırden sheteldik serıaldardyń taratylý ýaqyty úsh esege deıin azaıatynyn kórsetedi.
Sheteldik kórsetilimderdi azaıtý aǵymdaǵy jyly 60 000 000 teńgeni únemdeýge múmkindik beredi. Únemdelgen qarjy otandyq ónim shyǵarýǵa jumsalady.
«Qazaqstan» telearnasyndaǵy sheteldik kıno kórsetilim tek arnanyń televızııalyq aýdıtorııasynyń qalaýyna baılanysty júrgizilgen saraptamadan keıin kórsetiledi.
«Qazaqstan» ulttyq telearnasy efırge 1958 jyldyń 8 naýryzynan bastap shyqty. Ortasha táýliktik habar taratý kólemi - 21 saǵat. Eń úlken habar taratý jelisi bar arna Qazaqstan Respýblıkasy turǵyndarynyń 98,73 paıyzyn qamtıdy. Gellap TNS zertteý málimetteri boıynsha, Qazaqstan Respýblıkasy boıynsha 6 jastan joǵary qazaq tildi aýdıtorııada «Qazaqstan» telearnasy kórý kórsetkishi boıynsha aldyńǵy oryndarda.
