11 qarashada elimizdegi qandaı joldar jabyq
ALMATY. KAZINFORM — «QazAvtoJol» ulttyq kompanııasy qolaısyz aýa raıyna baılanysty respýblıkalyq mańyzy bar avtojoldardaǵy qazirgi qozǵalys shekteýleri men jyldamdyq rejımindegi ózgerister týraly habarlady.
2025 jylǵy 11 qarasha saǵat 08:00–degi jaǵdaı boıynsha Qyzylorda oblysynda qolaısyz aýa raıyna baılanysty túngi ýaqytta engizilgen ýaqytsha shekteýler alynyp tastaldy. Respýblıkalyq mańyzy bar «RF shekarasy — Mártók — Aqtóbe — Qarabutaq — Qyzylorda — Shymkent — Taraz — Qordaı — Almaty — Qorǵas — QHR shekarasy» avtojolynyń 1699-1912-shaqyrymynda (Jalaǵash — Baıgequm aýyldary aralyǵy) qozǵalys qaıta ashyldy.
Degenmen aýa raıynyń nasharlaýyna baılanysty Shyǵys Qazaqstan oblysynda 5 qarashadan bastap tirkemesi bar jáne jartylaı tirkemeli júk kólikteriniń qozǵalysy Osınov asýynda ýaqytsha shekteldi. Shekteý «Óskemen — Altaı — Katonqaraǵaı — Rahman qaınary» avtojolynyń 46-66-shaqyrymyndaǵy (Severnoe aýyly — Serebrıansk qalasy) ýchaskesinde saqtalady.
Bul shara taýly jerde jol qaýipsizdigin qamtamasyz etý maqsatynda qabyldanyp, qys maýsymy aıaqtalǵanǵa deıin kúshinde bolady.
Sondaı-aq keıbir joldarda qolaısyz aýa raıyna baılanysty jyldamdyq rejımine shekteýler engizildi.
Qaraǵandy oblysy:
• 2025 jylǵy 8 qarashadan bastap respýblıkalyq mańyzy bar «KAZ 01 Astana — Qaraǵandy — Almaty» avtojolynyń 92-164-shaqyrymynda (Anar stansasynan Temirtaý qalasyna deıingi aralyqta) barlyq kólik túrine jyldamdyq shekteýi 110-nan 60 shaq/saǵ-qa deıin azaıtyldy.
Aqmola oblysy:
• 8 qarashadan bastap «Astana — Qaraǵandy — Almaty» avtojolynyń 30-92-shaqyrymynda (Jibek joly kenti — Anar stansasy) jyldamdyq shekteýi 110-nan 60 shaq/saǵ-qa deıin tómendetildi;
• 7 qarashadan bastap «Astana — Kókshetaý — Petropavl — RF shekarasy» avtojolynyń 19-231-shaqyrymynda (Astana — Şýchınsk qalalary aralyǵy) barlyq kólik túrine jyldamdyq shekteýi 110-nan 80 shaq/saǵ-qa deıin azaıtyldy.
Aýa raıy
2025 jylǵy 11 qarashada Aqmola, Soltústik Qazaqstan, Qaraǵandy, Ulytaý jáne Pavlodar oblystarynda qar aralas jańbyr men qar jaýady.
Sol sebepti júrgizýshiler jyldamdyq rejımi men qaýipsiz araqashyqtyqty qatań saqtap, joldardaǵy aýa raıynyń qolaısyzdyǵyn eskergeni jón.
Eske salaıyq, buǵan deıin Qaraǵandy oblysy joldarynda qysqy qaýipsizdik sharalary kúsheıtilgenin habarlaǵanbyz.
11 qarashada eldiń 15 óńirinde jáne Astanada aýa raıyna baılanysty eskertý jarııalandy.