11 qańtardan bastap kórermender «Qazaqstan daýysy» jeńimpazyn anyqtaı alady
ASTANA. QazAqparat - 2015 jyldyń 11 qańtarynan bastap ár jeksenbi saıyn «Qazaqstan» telearnasynyń efırine shyǵatyn "Qazaqstan daýysy" jańa kezeńi kórermenderge jol tartady.
Osy kezeńnen bastap qazaqstandyqtar tikeleı efırde smspen daýys berý arqyly jobanyń jeńimpazyn anyqtaýǵa múmkindik alady.
Al ázirshe "Shaıqas" kezeńi sharyqtaý shegine jetip qaldy. Aldaǵy jeksenbide «Qazaqstan» telearnasynda kezeńniń sońǵy sany efırge shyǵady.
Esterińizde bolsa, alǵash bolyp sahnaǵa kóterilgen Ernur Qabyldaev men Nursultan Esenquldyń úzdigin tańdaý Madınaǵa qıyn boldy. Keńesshisi Gaýhardyń kómegimen tálimger Ernurdy jobada qaldyrdy. Sondaı-aq Madınanyń tobyndaǵy ekinshi jup Azamat Jumaǵalıev pen Sana Muqanovanyń arasynan Sana úzdik shyqty.
Al tálimger Nurlannyń tobynan Ádilhan Makın men Nurman Arystanov, Erbota Uzaqbaev pen Dástúr Asylhan óner kórsetti. Byltyr alǵashqy maýsymdaǵy úmitker Ádilhan Makın bul joly taǵy da súrindi. Al qarsylasynan jeńilgen Dástúr Asylhandy Almas Kishkenbaev óz tobyna qosyp aldy.
Medeý Arynbaevtyń tobynan Jandos Raıymbekov pen Farıza Jolamanova kelesi kezeńge ótti. Al olardyń qarsylastary Saǵyn Túsipov pen Zarına Ámirhanovanyń joly bolmady.
Almas Kishkenbaevtyń tobynan bir ǵana jup - Ásem Mahambetova men Aınur Ábdıeva óner kórsetti. Nátıjesinde Almas Aınur Ábdıevaǵa senim artty .
"Qazaqstan daýysynyń" ekinshi kezeńi úmitkerlerdiń baǵyn synap, tálimgerlerdiń júıkesin juqartty. Olar "Kórmeı tyńdaý" kezeńinde tańdaǵan ánshilerin óz qalaýymen jobadan shyǵaryp jatyr - shart solaı. Sebebi, tek tańdaýlylar ǵana aqtyq synǵa jol tartady.
Uıymdastyrýshylardyń bergen málimetine sáıkes, kórshiles Ózbekstannan kelgen jas ánshi Shahlo Ahmetova Aleksandr Zatsepınniń « Işý tebıa» ánin Abylaı Ábdiraıymovpen birge oryndap shyqty. Medeý Arynbaevtyń jasaǵan tańdaýyna sáıkes, Shahlo «Shaıqas» kezeńinen ótip, sońǵy 3 kezeńge joldama aldy.
Bul joba The Voice of Holland (Nıderlandy) nemese «Golos» túpnusqalyq formatynyń qazaqstandyq nusqasy 2013 jyldyń jazynda bastaldy. «Qazaqstan daýysy» jobasynyń alǵashqy maýsymynyń jeńimpazy - Qostanaı oblysynyń týmasy 27 jastaǵy Shaharızat Seıdahmet. Oryndaýshynyń tálimgeri - Nurlan Alban. Baıqaý jeńimpazy álemge áıgili «Universal» dybys jazý stýdııasymen bir jylǵa kelisimshartqa otyrý múmkindigine qol jetkizip, 5 mıllıon teńge qarjylaı syıaqyǵa ıe boldy.
«Qazaqstan daýysy» 3 kezeńnen turady. Birinshi kezeń - barlyq qatysýshylardy tyńdaý arqyly ádilqazylardyń árqaısysy tórt top qurady. Ekinshi kezeńde ár túrli toptardyń múshelerinen quralǵan juptyq saıys ótkiziledi. Úshinshi kezeńde jeńimpazdardy halyq SMS-daýys berý arqyly anyqtaıtyn bolady.
