11 bolashaq dáriger bilimin dáleldeı almaı, dıplomsyz qaldy - Eljan Birtanov
QR Densaýlyq saqtaý mınıstri Eljan Bitanovtyń aıtýynsha, mundaı júıe medıtsınalyq eńbek naryǵyn kezdeısoq kadrlardan saqtaıdy.
«Biz jańa talap engizdik. Medıtsınalyq oqýǵa túsý úshin bıyldan bastap qosymsha emtıhan engizdik. Talapker medıtsına mamandyǵyna psıhologııalyq turǵyda saı ekenin test tapsyrý arqyly dáleldeýi tıis. Bul da - álemde bar praktıka. Bıyldan bastap joǵary oqý ornynyń túlekteri dıplom ǵana alyp qoımaı, bilimdi tekserýdiń táýelsiz saraptamasynan ótedi. Sol úshin arnaıy baǵalaý ortalyǵy jumys isteıtin bolady. Eger túlek bilimin dáleldeı almasa, dıplom berilmeıdi. Bıyldyń ózinde 11 túlek óz bilimin dáleldeı almaı, dıplomsyz qaldy. Endi olarǵa bir jyl ishinde qaıta emtıhan tapsyryp, dıplomǵa laıyq ekenin kórsetý qajet. Osy arqyly medıtsına eńbek naryǵyna ótýdiń sharttary qatańdatylyp otyr. Áıtpese, qazir kóptegen oqý oryndary stýdentteriniń barlyǵy dıplom alyp ketýine múddeli bolyp alǵan», - dedi vedomstvo basshysy.
Ortalyq kommýnıkatsııalar qyzmetinde ótken brıfıngte Eljan Birtanov bıyldan bastap bolashaq dárigerlerdiń nege 6 jyl ǵana oqıtynyn túsindirdi.
«Biz medıtsına mamandyǵyna oqýshylardyń merzimin 7 jyldan 6 jylǵa qysqartamyz. Buryn 5 jyl bakalavr, 2 jyl ınternatýra negizderin úırense, endi «5+1» júıesi qoldanylady. Bir jaǵynan, biz oqytý protsesin birizdendiremiz. Basy artyq teorııalyq pánderdi alyp tastaımyz. Osynyń arqasynda zamanaýı bilim tehnologııalarynyń kómegimen dárigerlerdi jyldam daıyndaıtyn bolamyz. Ekinshi jaǵynan, bul tásil halyqaralyq standarttarǵa da, Bolon protsesiniń oqytý júıesine de tolyǵymen sáıkes keledi», - dedi ol.
Mınıstr bıylǵy medıtsına túlekteriniń teń jartysyna jýyǵy aýyldyq jerlerge jiberilgenin de aıtty.
«Buǵan deıin medıtsına salasyna bólinetin oqý granttarynyń sany shynaıy qajettilikke sáıkes bolmaǵanyn anyqtadyq. Bıyldan bastap biz ony óńirlerdiń qajettiligine saı qaıta rettedik. Al bıylǵy túlekterdiń 48 paıyzy aýyldarǵa jiberildi. Byltyr 700 túlek aýylǵa barsa, bıyl 2000 túlek aýylda jumys bastaıtyn bolady. Jergilikti ákimdikter baspana men áleýmettik qamsyzdandyrý boıynsha barlyq mindetin atqaryp jatyr», - dedi Eljan Birtanov.