11 balanyń onynshysy: petropavldyq Damır Abdınniń respýblıkaǵa tanylǵan volonterlik qozǵalysy

Kazinform tilshisi ózgege kómektesýdi ómirlik ustanymyna aınaldyrǵan, «Pomoş rıadom» volonterlik qozǵalysynyń negizin qalaýshy, qalalyq Jastar resýrstyq ortalyǵynyń jetekshisi Damır Abdındi áńgimege tartty. 

- Damır, volonterlik joldy tańdaýyńyzǵa ne sebep boldy?

- Men kópbalaly otbasynda, aýylda óstim. Otbasymyzda 11 bala boldyq, men onynshy balamyn. Kishkentaı kezimizde óte qıyn boldy. Týǵan-týysymyz, kórshilerimiz kıim-keshekpen, azyq-túlikpen kómektesetin. Keıin óse kele ózim ata-ájelerge kómektese bastadym. Úlken otbasynda ósken adam ózgelerdi túsinýge, bólisýge, úlkendi syılap, jaqyndaryńa qoldaý kórsetýge úırenedi. Bul qasıetterdiń volonterlik qyzmette de mańyzy zor. Óıtkeni kómek kórsetý úshin adamnyń muńyn tyńdap, jaǵdaıyn túsine bilý kerek.

- «Pomoş rıadom» qozǵalysyn qurý ıdeıasy qalaı paıda boldy?

- Bastapqyda habar-osharsyz ketken adamdardy izdeýge kómektestim, tájirıbe jınadym. Meniń volonterlik jolym osydan bastaldy. Keıde bolmashy bolyp kórinetin kómektiń ózi bir otbasy úshin úlken qoldaý bolyp jatady.  Aldymen bir jyl jalǵyz ózim eńbek ettim. Biraq komandasyz óte qıyn ekenin túsinip, áleýmettik jelide paraqsha ashyp, habarlandyrý berdim. Qatarymyz kóbeıe bastady.

Osylaısha, «Pomoş rıadom» qozǵalysyn 2019 jylǵy 5 maýsymda qurdym. Bastapqyda bul ózgelerge kómektesýge degen qarapaıym nıet edi. Ýaqyt óte kele ortaq maqsatqa beıjaı qaramaıtyn adamdar jınalyp, qozǵalys aýqymy keńeıdi. Qazir SQO-da ǵana 1,5 myń volonterymyz bar. Sondaı-aq Shymkent pen Astanada jumys istep jatyr bizdiń qozǵalys. 

Men úshin volonterlik - ádemi sóz ben fotosýret úshin jasalatyn jumys emes. Eger adamnyń jaǵdaıyn jaqsartýǵa múmkindigiń bolsa, nege kómektespeske? Eń bastysy, jaqsylyqty jalǵyz jasaýdyń qajeti joq. Adamdar birigip áreket etkende, kómektiń de aýqymy keńeıedi. 

- Qandaı ótinishter jıi túsedi?

- Biz kópbalaly jáne az qamtylǵan otbasylarǵa, qarttarǵa, balalarǵa, múgedektigi bar adamdarǵa jáne túrli sebeppen qıyn jaǵdaıǵa tap bolǵan azamattarǵa kómektesemiz. Kóbine azyq-túlik, kıim-keshek, jıhaz, turmystyq tehnıka, mektepke arnalǵan qural-jabdyqtar qajet bolyp jatady.

Jyl saıyn «Mektepke jol» aktsııasyn da ótkizemiz. Balalarǵa sómke, oqý quraldary, kıim men aıaq kıim jınaımyz. Ár ótinish nazardan tys qalmaıdy. Aldymen jaǵdaıdyń qanshalyqty shuǵyl ekenin, otbasynda balalardyń, qarttardyń nemese múgedektigi bar adamdardyń bar-joǵyn eskeremiz. Kerek zatyn berip qana qoımaı, máseleniń mánisin anyqtaýǵa tyrysamyz.

Qozǵalys qurylǵannan beri qansha adamǵa kómekteskenimizdiń naqty sanyn aıta almaımyn. Biraq árbir istiń artynda belgili bir otbasy bar. Keıde adamdar olardy tyńdap, túsinistik tanytyp, qıyndyqpen jalǵyz qaldyrmaǵanymyz úshin de alǵysyn jaýdyryp jatady. 

Volonterler qoǵamdyq negizde jumys isteıdi. Olardyń da jumysy, oqýy, otbasy men jeke sharýalary bar. Kómek te jınalǵan zattyń kólemine baılanysty kórsetiledi. Jalpy, qaıyrymdylyq – ol tek mindetti túrde aqsha berý emes. Kómektiń túri kóp, bireý aqparatpen bólisedi, tanystaryn kómekke shaqyrady nemese zattardy jetkizýge járdemdesedi. Ár adamnyń qolynan keletin is bar.

- Volonterlik qyzmet kóp ýaqyt pen kúshti talap etedi. Keıde sharshap, bárin tastaǵyńyz keletin kezder bola ma?

- Qoǵamdyq jumys ońaı emes. Bir mezette birneshe máseleni sheship, is-sharalardy uıymdastyryp, volonterlerdiń jumysyn úılestirip, adamdardyń ótinishine jaýap berýge týra keledi. Eń qıyny - barlyǵyna birdeı kómektese almaıtynyńdy túsiný. Qoldaý kútken adam kóp, al múmkindik shekteýli.

Ýaqyt óte kele barlyq máseleni jalǵyz sheshý múmkin emes ekenin túsindim. Óz qolyńnan keletin isti atqaryp, basqalardy ortaq iske jumyldyra bilý kerek. Maǵan komandamnyń qoldaýy, jaqyndarymnyń túsinistigi jáne eńbegimizdiń nátıjesin kórý kúsh beredi.
Volonter de adam. Sondyqtan óz kúshińdi saqtaý, mindetterdi bólisý jáne komandaǵa sený mańyzdy.

- Qalalyq Jastar resýrstyq ortalyǵyn da basqarasyz. Qazirgi jastardyń qoǵamdyq belsendiligin qalaı baǵalaısyz?

- Petropavlda belsendi, talantty ári aınalasyna beıjaı qaramaıtyn jastar kóp. Olar ártúrli jobalarǵa qatysyp, ózgelerge kómektesýge, óz ıdeıalaryn júzege asyrýǵa jáne qalanyń damýyna úles qosýǵa daıyn.

Biraq jastardy belsendi bolýǵa shaqyrý jetkiliksiz. Olarǵa múmkindik berip, bastamalaryna senim artyp, qoldaý kórsetý kerek. Bireýdi adamdarǵa kómektesý yntalandyrsa, endi bireý jańa bilim alyp, tájirıbe jınaýdy nemese pikirles dostar tabýdy qalaıdy.
Keı jastarǵa alǵashqy qadam jasaý úshin senimdilik pen aqparat jetispeıdi. Jastar resýrstyq ortalyǵynyń mindeti - olarǵa baǵyt kórsetip, pikirlesterin tabýǵa jáne ıdeıalaryn naqty jobaǵa aınaldyrýǵa kómektesý.

- Qoǵamdyq qyzmet sizdi qalaı ózgertti? Jumys pen jeke ómirdiń arasyndaǵy tepe-teńdikti saqtaý qıyn emes pe?

- Bul jumys ómirge degen kózqarasyńdy ózgertedi. Sabyrly bolýdy, jaýapkershilik alýdy, tyńdaı bilýdi jáne ártúrli adammen til tabysýdy úırenesiń. Árıne, bos ýaqytyńnyń bir bóligin qoǵamdyq iske arnaýǵa týra keledi. Keıde shuǵyl ótinishter túsip, jospardy ózgertý qajet bolady. Desek te jumys pen jeke ómirdiń arasyndaǵy tepe-teńdikti saqtaýǵa tyrysamyn.

Men volonterlikpen kópke tanylý nemese marapat alý úshin aınalyspaımyn. Eger adam ózgege tek alǵys estý úshin kómektesse, bir kúni kóńili qalýy múmkin. Men úshin bireýge kómektesý ómirlik ustanymǵa aınalǵan. 

- Aldaǵy josparlaryńyz qandaı? Volonterlikpen aınalysqysy keletin jastarǵa qandaı keńes berer edińiz?

- Aldaǵy ýaqytta «Pomoş rıadom» qozǵalysyn damytyp, qatarǵa jańa volonterlerdi tartqym keledi. Sondaı-aq uıymdarmen, kásipkerlermen jáne beıjaı qaramaıtyn turǵyndarmen yntymaqtastyqty nyǵaıtý mańyzdy.

Petropavlda qıyn jaǵdaıǵa tap bolǵan ár adam qoldaý suraýdan qoryqpaı, ózin tyńdaıtyn jáne kómektesýge daıyn jandar bar ekenin bilse deımin. Jastardyń da óz qabiletin tanytyp, bastamalaryn júzege asyrýyna múmkindik kóp bolǵanyn qalaımyn.

Volonterlikke qyzyǵatyn, biraq neden bastaryn bilmeı júrgen jastarǵa aıtarym: qolaıly sátti kútip júre bermeńizder. Aldymen shaǵyn isten bastańyzdar. Qart kórshińizge kómektesińiz, qıyndyqqa tap bolǵan otbasyn qoldańyz, qaıyrymdylyq aktsııasyna qatysyńyz nemese jaı ǵana jaǵdaıy qıyn adamnan halin surańyz.

Keıde bir ǵana ıgi is úlken bastamanyń negizine aınalady. Árqaısymyz anda-sanda bolsa da bireýge jaqsylyq jasasaq, qalamyz da, elimiz de jaqsy jaqqa ózgeredi.

Buǵan deıin «Jyl volonteri» halyqaralyq syılyǵyna daýys berý bastalǵanyn jazǵan edik.