11 aıda ónerkásiptik óndiris kólemi 0,7 paıyzǵa artty
A. Jeltoqsannyń 9-y. QazAqparat /Rýslan Ǵabbasov/ - Qazan aıynda qyzmetkerlerge eseptelgen ortasha aılyq ataýly jalaqy 67 myń teńgeni qurady. Bul týraly búgin Astanada 11 aıdyń qorytyndysyna arnalǵan baspasóz máslıhatynda QR Statıstıka agenttiginiń tóraǵasy Álıhan Smaıylov málim etti,
dep habarlaıdy QazAqparat.
Onyń aıtýynsha, bıylǵy jylǵy 11 aıdyń qorytyndysy boıynsha ónerkásiptik óndirisiniń kólemi 0,7 paıyzǵa artty. Aýyl sharýashylyǵy salasynda ónimniń kólemi 10,6 paıyzǵa joǵarylady. Qazirgi kezde jumyssyzdyq deńgeıi 548 myń adam, ıaǵnı 6,5 paıyzdy quraıdy. Bul jyldyń basymen salystyrǵanda tómen kórsetkish.
«Qazan aıynda qyzmetkerlerge eseptelgen ortasha aılyq ataýly jalaqy 67 myń teńgeni qurady. Ótken jyldyń osy kezeńimen salystyrǵanda bul 9 paıyzǵa artyq. Al naqty jalaqy ındeksi qazanda 103 paıyzǵa jetti»,-dedi Agenttik tóraǵasy.
Agenttiktiń málimetine qaraǵanda, bıylǵy jyldyń qańtary men qarasha aıynda negizgi kapıtalǵa salynǵan ınvestıtsııa kólemi 3897,1 mıllıard teńgeni qurady. Bul kórsetkish ótken jyldyń osy kezeńine qaraǵanda 2,3 paıyzǵa artyq.
