11 aıda munaı óndirý kólemi 2,4 paıyzǵa qysqardy
ASTANA. QazAqparat - Aǵymdaǵy jylǵy 11 aıda munaı óndirý kólemi 2,4 paıyzǵa kemidi. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Ulttyq ekonomıka vıtse-mınıstri Mádına Ábilqasymova málim etti.
Vıtse-mınıstr óz sózinde taý-ken óndirý ónerkásibi salasy sheginde munaı óndirý kóleminiń tómendeýi baıqalǵanyn atap ótti.
«Ótken jyldyń sáıkes kezeńimen salystyrǵanda munaı óndirý kólemi 2,4 paıyzǵa tómendedi. Bul TShO-nyń 27 kúnge josparlanǵan kúrdeli jóndeý jumystarynyń 37 kúnge sozylýymen baılanysty. Nátıjesinde TShO 2014 jyly munaı óndirý josparyn 27,1 mln. tonnadan 26,2 mln. tonnaǵa deıin tómendetti»,- dedi M.Ábilqasova.
Sonymen qatar ol óńdeý ónerkásibindegi naqty ındeks kólemi 0,7 artqanyn, al taý-ken óndirý ónerkásibindegi óndiris 0,4 paıyzǵa kemigenin atap ótti.
