11 aıda Qazaqstanda 5,4 mln. sharshy metr turǵyn úı aýmaǵy salyndy
ASTANA. 30 jeltoqsan. QazAqparat - Qazaqstanda 2011-2014 jyldarǵa arnalǵan Memlekettik turǵyn úı-qurylys baǵdarlamasy júzege asyrylýda, baǵdarlama aıasynda jyl saıyn elimizde 6 mln. sharshy metr turǵyn úı aýmaǵy paıdalanýǵa beriledi. 2011 jyldyń 11 aıynyń qorytyndysy boıynsha respýblıkamyzda 5,4 mln. sharshy metr turǵyn úı aýmaǵy saldyndy, dep habarlady pm.kz saıtynan.
Bul baǵdarlamanyń aldynda turǵyn úı qurylysyn yntalandyrý men jyljymaıtyn múlik naryǵyn damytý boıynsha aýqymdy sharalar qolǵa alynǵan 2008-2010 jyldarǵa arnalǵan Memlekettik turǵyn úı baǵdarlamasy júzege asyrylǵanyn aıta ketý kerek.
«Táýelsizdik jyldary bir jarym mıllıonǵa jýyq qazaqstandyq ózderiniń turǵyn úı jaǵdaılaryn jaqsartty. 2005-2007 jyldar aralyǵynda 17 mıllıon sharshy metr turǵyn úı aýmaǵy salynǵan», - dep málim etti Elbasy Nursultan Nazarbaev Qazaqstan Respýblıkasy Táýelsizdiginiń 20 jyldyǵyna arnalǵan saltanatty jıynda.
«Biz turǵyn úı qurylys baǵdarlamasyn júzege asyrdyq. 2008-2010 jyldarǵa arnalǵan Memlekettik turǵyn úı baǵdarlamasy boıynsha 19,7 mln. sharshy metr aýmaqtaǵy úıler paıdalanýǵa berilip, 535 myńǵa jýyq qazaqstandyq baspana máselesin sheshti», - dep málim etti elimizdiń Úkimet basshysy Kárim Másimov «Nur Otan» partııasynyń parlamenttik fraktsııasynyń otyrysynda.
Álemdik tájirıbe kórsetip otyrǵandaı, kóptegen elder kúsh-jigerin qurylys pen turǵyn úı satyp alýdy júzege asyratyn qarjy ınstıtýttaryn qoldaýǵa jumsaıdy. Mysaly, Sıngapýrda zeınetaqy jınaqtaryn paıdalaný arqyly ıpotekalyq nesıe berý júıesin damytý baspanamen qamtamasyz etý paıyzyn 3 esege, atap aıtsaq, 1970 jylǵy 27 paıyzdyq kórsetkishten qazirgi tańdaǵy 91 paıyz kórsetkishke jetkizgen. Sıngapýrdaǵy turǵyn úı qurylysy arnaıy qurylǵan memlekettik uıym arqyly iske asyrylady.
2011 jyldyń qorytyndysy boıynsha Qazaqstanda turǵyn úı qurylysyna salynǵan ınvestıtsııa mólsheri 361,5 mlrd. teńgeni nemese 2010 jyldyń sáıkes kezeńimen salystyrǵanda 124,7 paıyzdy qurady. 11 aı ishinde 5,4 mln. sharshy metr aýmaqtaǵy turǵyn úı salynǵan. Turǵyn úıdi paıdalanýǵa berý mólsheri jyldyq jospardyń 90 paıyzyn qurady. 2011 jyly paıdalanýǵa berilgen turǵyn úı kólemi Ońtústik Qazaqstan, Aqmola jáne Batys Qazaqstan oblystarynda 1,4 esege, Pavlodar oblysynda 1,3 esege artqanyn aıta ketý kerek.
Qazaqstandaǵy memlekettik sektor respýblıka boıynsha turǵyn úıdi paıdalanýǵa berý kóleminiń 9,7 paıyzyn ǵana quraıtyndyǵy - turǵyn úı qurylysyn damytýdaǵy mańyzdy kórinis bolyp tabylady. 2011 jyldyń 11 aıynda memlekettik jekemenshiktegi kásiporyndar men uıymdar 521,4 myń sharshy metr turǵyn úı aýmaǵyn, al kórsetilgen kezeń ishinde jekemenshik formadaǵy uıymdar 4,6 mln. sharshy metr turǵyn úı aýmaǵyn paıdalanýǵa bergen.
2011 jyly nesıe qarajaty esebinen turǵyn úı qurylys jınaqtaý júıesi arqyly baspana salý jáne paıdalanýǵa berý úshin respýblıkalyq bıýdjetten 28,8 mlrd. teńge bólingen. Qazaqstannyń Turǵyn úı jınaq banki qyzmetin bastaǵannan beri 207,7 myń qatysýshy 64,4 mlrd. teńge bolatyn jalpy jınaqtaý somasyna turǵyn úı qurylys jınaq týraly kelisimshartqa qol qoıǵan. Turǵyn úı qurylys jınaq týraly qol qoıylǵan kelisimsharttardyń basym bóligi Astana (15,4 paıyz) jáne Almaty (13,5 paıyz) qalalaryna, Aqtóbe (8,2 paıyz) jáne Shyǵys Qazaqstan oblystaryna (7,7 paıyz) tıesili.
Jekemenshik turǵyn úı qurylysyn damytýdy yntalandyrý jyljymaıtyn múlik naryǵyn damytý salasyndaǵy júıeli saıasattyń negizgi baǵyttarynyń biri bolyp tabylady. Sondyqtan respýblıkadaǵy turǵyn úı qurylys máselesin keshendi sheshý maqsatynda turǵyn úı qurylys salynatyn aýmaqtardy ınjenerlik-kommýnıkatsııalyq ınfraqurylymmen qamtamasyz etýge baǵyttalǵan jumystar atqarlyp jatyr.
