11 aıda elimizde telemedıtsınalyq ortalyqtar arqyly 16 myńnan astam qashyqtyqtan keńes berildi
ASTANA. 29 jeltoqsan. QazAqparat - 2011 jyldyń 11 aıynda elimizdegi telemedıtsınalyq ortalyqtar arqyly 16 myńnan astam qashyqtyqtan keńes berý uıymdastyryldy,
dep habarlady QR Densaýlyq saqtaý mınıstrliginiń baspasóz qyzmetinen.
Qazaqstan TMD elderi ishinde alǵashqy bolyp telemedıtsına salasyn damyta bastady. Qazirgi ýaqytta respýblıkada 183 telemedıtsınalyq ortalyq jumys isteıdi. 2011 jyldyń 11 aıynda elimizdegi telemedıtsınalyq ortalyqtar bazasynda respýblıkalyq ortalyqtardyń, sonymen qatar shetelderdiń jetekshi emhanalarynyń joǵary bilikti mamandary naýqastarǵa 16 myńnan astam qashyqtyqtan keńes berdi.
Osy oraıda aıta ketetin jaıt, 2011 jyldan bastap azamattardy shetelderge emdeýge jiberýdiń jańa erejeleri engizildi. Sol boıynsha mindetti shart naýqas jiberiletin sheteldik emhanamen aldyn ala telemedıtsınalyq keńes júrgizilýi kerek.
