11 aıda ekonomıka ósimi 6,4 paıyz boldy – Serik Jumanǵarın

ASTANA. KAZINFORM — Bıyl 11 aıda negizgi kapıtalǵa salynǵan ınvestıtsııalar 13,3 paıyzǵa artyp, 18,5 trln teńgeni qurady. Bul týraly búgin Úkimet otyrysynda Premer-mınıstrdiń orynbasary – Ulttyq ekonomıka mınıstri Serik Jumanǵarın aıtty.

- Ekonomıka turaqty ósý qarqynyn kórsetýde. Bıylǵy qańtar-qarashanyń qorytyndysy boıynsha ekonomıkanyń ósimi 6,4 paıyzdy qurady. Naqty sektordaǵy ósim 8,3 paıyz boldy jáne qyzmet kórsetý óndirisiniń 5,3 paıyzǵa ósýinen joǵary bolyp qalyptasty. Negizgi draıverler – kólik qyzmetteri, qurylys jáne taý-ken ónerkásibi. Saýda - 8,8, aýyl sharýashylyǵy - 6,1, óńdeý ónerkásibi 5,9 paıyzǵa ósti, - dedi ol.

Mınıstrdiń aıtýynsha, ınvestıtsııalar ósim faktory bolyp otyr. Negizgi kapıtalǵa salynǵan ınvestıtsııalar 13,3 paıyzǵa artyp, 18,5 trln teńgeni qurady. Onyń ishinde jeke ınvestıtsııalar 9,8 paıyzǵa ulǵaıdy.

- Investıtsııalardyń eń joǵary ósimi bolashaq sapaly ósý bazasyn qalyptastyratyn salalarda baıqalýda. Qarjy qyzmetinde – 82,8, elektr energııasymen, gazben, býmen, ystyq sýmen jabdyqtaýda – 57,9, bilim berýde – 31,6, aqparat jáne baılanysta – 24,5, aýyl sharýashylyǵynda – 24,1, óńdeý ónerkásibinde – 20,7, kólik qyzmetterinde 13,3 paıyzǵa ósim tirkeldi. Investıtsııalardyń eń kóp ósýi Aqmola, Pavlodar, Jambyl, Almaty jáne Aqtóbe oblystarynda baıqaldy. Investıtsııalardyń tómendeýi Atyraý jáne Qaraǵandy oblystarynda tirkeldi, - dedi Serik Jumanǵarın.

Aıta keteıik, Úkimet eldiń 11 aıdaǵy áleýmettik-ekonomıkalyq damý qorytyndylaryn qarap jatyr.