11 aıda 858 myńnan astam adam ataýly áleýmettik kómek aldy

NUR-SULTAN. QazAqparat - 1 jeltoqsandaǵy jaǵdaı boıynsha ataýly áleýmettik kómek (AÁK) 168,6 myń otbasynyń 858,2 adamyna 58,3 mlrd. teńge somasynda tólendi, dep habarlaıdy QazAqparat.

QR eńbek jáne halyqty áleýmettik qorǵaý mınıstrliginiń baspasóz qyzmetiniń habarlaýynsha, otbasynyń árbir múshesine jan basyna shaqqandaǵy ortasha tabysy óńirlik eń tómengi kúnkóris deńgeıiniń 70%-ynan tómen azamattarǵa AÁK taǵaıyndalady.

Budan basqa, AÁK kórsetýdiń jańa tetigin iske asyrý sheńberinde elimizdiń barlyq óńirlerinde tabysy az otbasylardyń mektep jasyna deıingi balalaryn kepildik berilgen áleýmettik toptamamen (budan ári – áleýmettik toptamamen) qamtamasyz etý boıynsha jumys júrgizilýde.

Aǵymdaǵy jyldyń 11 aıynda áleýmettik toptama alýshylardyń jalpy sany 158,1 myń otbasyn nemese 431,3 myń adamdy qurady.

1 jastan 6 jasqa deıingi AÁK alýshylar qatarynan 216,4 myń bala azyq-túlik jıyntyǵy jáne turmystyq hımııa túrinde kepildik berilgen áleýmettik toptama aldy.

Esterińizge sala keteıik, 130 myń qazaqstandyq otbasynyń 650 myńnan astam adamyna IV toqsanda ataýly áleýmettik kómek taǵaıyndaý memlekettik ınstantsııaǵa júginbeı-aq avtomatty túrde uzartyldy. QR Eńbek jáne halyqty áleýmettik qorǵaý mınıstriniń tıisti buıryǵy aǵymdaǵy jyldyń 25 qyrkúıeginde qabyldandy.

AÁK alýshylarǵa budan buryn, II jáne III toqsanda TJ rejımi men karantındik shekteý sharalarynyń qoldanylýyna baılanysty kómek taǵaıyndaý uzartylǵan bolatyn.