11 aıda 16,9 mln sharshy metr turǵyn úı paıdalanýǵa berildi
ASTANA. KAZINFORM — Elimizdiń 19 óńirinde qurylys jumystarynyń ósimi baıqaldy. Bul týraly búgin Úkimet otyrysynda Premer-mınıstrdiń orynbasary – Ulttyq ekonomıka mınıstri Serik Jumanǵarın aıtty.
Mınıstrdiń dereginshe, bıyl 11 aıda óńdeý ónerkásibindegi óndiris 5,9 paıyzǵa ósti. Ósim 17 óńirde tirkeldi. Eń joǵary ósim Soltústik Qazaqstan, Batys Qazaqstan, Túrkistan oblystarynda, sondaı-aq Almaty jáne Shymkent qalalarynda baıqaldy. Óndiristiń tómendeýi Shyǵys Qazaqstan, Aqmola, Mańǵystaý oblystarynda tirkeldi.
- Óńdeý ónerkásibindegi ósý kólik jasaý óndirisiniń 11,6 paıyzǵa, onyń ishinde avtomobıl jasaýdyń – 15,2 jáne elektr jabdyqtaryn jasaýdyń 16,7 paıyzǵa ósimi esebinen qamtamasyz etildi. Tamaq ónimderin óndirý – 8,7, sýsyndar óndirý – 9,2, hımııa ónerkásibi – 8,1, munaı óńdeý ónimderi – 6,5, metall buıymdary – 12,8, qurylys materıaldary 7,1 paıyzǵa ulǵaıdy. Salalardaǵy ınvestıtsııalar men óndiris ósýiniń negizgi faktorlarynyń biri - «Báıterek» holdıngi tarapynan basym baǵyttardy qarjylyq qoldaýmen qamtamasyz etý, - dedi ol.
Serik Jumanǵarınnyń aıtýynsha, osy jyldyń 11 aıynda holdıng jelisi boıynsha basym salalardy qarjylandyrý kólemi 8 trln teńgeden asty.
- Taý-ken ónerkásibi 9,7 paıyzǵa ulǵaıyp, áli de joǵary ósý qarqynyn saqtap otyr. Bul munaı óndirýdiń - 14,1, tabıǵı gaz óndirýdiń - 16,7 jáne kómir óndirýdiń 9,7 paıyz artýymen baılanysty. Bul rette metall kenderin óndirý 0,6 paıyzǵa qysqardy, - dedi mınıstr.
Onyń sózine qaraǵanda, qurylysta ósý qarqyny baıaýlady. Qurylys jumystary kóleminiń ósimi 14,7 paıyzdy qurady.
- Qurylystyń ósimi 19 óńirde tirkeldi. Bul rette eń joǵary ósý Almaty, Astana qalalarynda, Soltústik Qazaqstan, Qyzylorda jáne Túrkistan oblystarynda baıqaldy. Atyraý oblysynda qurylys jumystarynyń kólemi tómendedi. 16,9 mln sharshy metr turǵyn úı paıdalanýǵa berildi. Bul ótken jyldyń sáıkes kezeńinen 3,9 paıyzǵa artyq. Eń joǵary kórsetkishter Jetisý, Qaraǵandy, Almaty, Qyzylorda jáne Ulytaý oblystarynda baıqalady, - dedi Serik Jumanǵarın.
Aıta keteıik, Úkimet eldiń 11 aıdaǵy áleýmettik-ekonomıkalyq damý qorytyndylaryn qarap jatyr.