11 aıda 1 mlrd 57 mln tonna júk tasymaldandy – Kólik mınıstrligi

ASTANA. KAZINFORM — Bıyl 11 aıda 1 mlrd 764 mln jolaýshy tasymaldandy. Bul týraly búgin Úkimet otyrysynda  Kólik vıtse-mınıstri Maqsat Qalıaqparov aıtty.

- Osy jyldyń 11 aıynyń qorytyndysynda «Kólik jáne qoımalaý» salasy boıynsha naqty kólem ındeksi 120,3 paıyz boldy. Salanyń ósim qarqynyna júk tasymalynyń jalpy kóleminiń artýy áser etti. Atap aıtqanda, júk tasymaly 1 mlrd 57 mln tonnany qurap, ótken jyldyń sáıkes kezeńimen salystyrǵanda 8,1 paıyzǵa ósti, - dedi vıtse-mınıstr.

Onyń málimetinshe, avtomobıl kóligimen júk tasymaly - 2,2, qubyrjol kóligimen - 15,4, sondaı-aq temirjol kóligimen 7,7 paıyzǵa artty. Barlyq kólik túri boıynsha jolaýshylar tasymaly 11,9 paıyzǵa ósip, 1 mlrd 764 mln jolaýshy boldy. Tasymal kóleminiń negizgi kórsetkishteriniń basym bóligi boıynsha ósim baıqalady.

Vıtse-mınıstrdiń aıtýynsha, júk tasymalynyń artýy ekonomıkanyń taý-ken metallýrgııa kesheni, munaı-gaz sektory, aýyl sharýashylyǵy, qurylys jáne saýda syndy bazalyq salalarynyń damýy esebinen qamtamasyz etildi. 

- Atalǵan salalar kólik qyzmetteriniń negizgi tutynýshylary sanalady jáne esepti kezeńde oń ósý dınamıkasyn kórsetti, - dedi Maqsat Qalıaqparov.

Buǵan deıin qańtar-qazan aılary aralyǵynda Qazaqstanda barlyq kólik túrimen 1 591,3 mln jolaýshy tasymaldanǵanyn jazǵan edik.