10 mln týrıstiń 9 mln-y qaıda qonǵanyn bilmeımiz — Erjan Erkinbaev

ALMATY. KAZINFORM — Almatyda «Qazaqstandaǵy tsıfrlyq týrızm — 2025» forýmy ótip jatyr.

Kazakh tourism uıymdastyrǵan is-shara barysynda týrızm salasyndaǵy ozyq ІT-sheshimder men tehnologııalyq trendter usynyldy. Úsh paneldik pikirtalas aıasynda týrızm ındýstrııasyndaǵy tsıfrlandyrý máseleleri, týrızmdi damytýdaǵy memlekettik tsıfrlyq qyzmetterdiń róli jáne ózge de taqyryptar talqylandy.

Týrızm jáne sport mınıstriniń orynbasary Erjan Erkinbaev qonaq úılerdiń kópshiligi týrıster týraly derekterdi jınap, paıdalanýǵa kómek beretin eQonaq platformasyn qoldanbaı otyrǵanyn málimdedi.

— Kelgen týrısterdi tirkeý úshin eQonaq qosymshasy ázirlendi. Ol arqyly 1 mınýt ishinde kóshi-qon qyzmetine kelgen qonaq týraly aqparat berýge bolady. Biraq ony barlyq qonaq úıler qoldana bermeıdi. 2024 jyly elimizge shetelden 15,3 mln adam kelse, onyń 10,4 mln adamy elimizde bir kún qondy. Osy adamdardy biz týrıst deı alamyz. Qosymshadan alǵan derekterge súıensek, olardyń 1 mıllıony qonaq úıde bolǵan. Qalǵan 9 mıllıony qaıda bolǵanyn bilmeımiz. Olardyń barlyǵy shatyrda jatýy ne týysqandarynyń úıinde bolýy múmkin be? Joq, sondyqtan derekterdi barynsha naqty jınaýǵa kómektesetin jańa usynystardy qabyldaımyz, — dedi ol.

Sonymen qatar Erjan Erkinbaev zańǵa ózgeris engizip, uıaly baılanys operatorlarynyń derekterin alý máselesi qarastyrylyp jatqanyn aıtty.

— Odan bólek biz zańǵa ózgeris engizip, statıstıka organdarynyń quzyretin keńeıtkimiz keledi. Mysaly, kóptegen elde týrızm salasy boıynsha uıaly baılanys operatorlarynyń derekterine súıenedi. Al bizde uıaly baılanys operatorlarynyń derekteri qoljetimsiz ne óte qymbatqa satylady. Bizge týrısterdiń Qazaqstanda qansha qarajat jumsaıtynyn bilý mańyzdy, — dedi vıtse-mınıstr.

Eske salaıyq, buǵan deıin týrısterge arnalǵan TravelStan qosymshasy jyl sońyna deıin iske qosylatynyn jazǵanbyz.