«10 mln dollarǵa aral satylady»: ShQO-da jelidegi jarnamaǵa qatysty ákimdikten jaýap berdi

Taıaýda áleýmettik jelide satylymǵa aral shyǵarylǵany týraly jazda jarııalanǵan bolatyn. Onda «Araldy satyp alý múmkindigi kúnde kezdese bermeıdi. Jeke menshiktegi 22,5 gektar jer birtutas ınvestıtsııalyq joba retinde usynylyp otyr» dep jazylǵan. Araldyń satylym baǵasy 10 mıllıon AQSh dollary dep baǵalanypty.

Alaıda keıin respýblıkalyq BAQ-tardyń birinde aral ıesi Sovet Muhıtovtyń araldyń satylmaıtyndyǵyn aıtqan vıdeosy tarady. Osy rette, Kazinform tilshisi ShQO Jer qatynastary basqarmasyna saýalhat jiberip, bul araldyń jeke menshikke qalaı ótkenin, onyń satylymǵa qoıylýy qanshalyqty zańdy bolatyndyǵyn surap kórdi.

— Atalǵan aral Shyǵys Qazaqstan oblysynyń Altaı aýdanyndaǵy Buqtyrma sý qoımasy aýmaǵynda ornalasqan. Aýdanaralyq ekonomıkalyq sottyń sheshimi negizinde Altaı aýdany ákimdiginiń 08.08.2006 jylǵy № 2595 qaýlysymen jer ýchaskesi jeke menshikke berilgen. Jer ýchaskesin satyp alý baǵasy jáne ony satý baǵasy týraly málimetter basqarmada joq, — dep jaýap berdi basqarma basshysy Nadejda Mıheılıs. 

Araldyń aýmaǵy 2008 jyly kadastrlyq nómirleri 05-070-033-027 (aýdany 161,1 ga), 05-070-033-030 (aýdany 24,7 ga), 05-070-033-028 (aýdany 24,1 ga), 05-070-033-029 (aýdany 15,1 ga) 4 jer ýchaskesine bólingen.

— Jer ýchaskeleriniń nysanaly maqsaty — taýarly aýyl sharýashylyǵy óndirisin júrgizý úshin dep kórsetilgen. QR Jer kodeksiniń 24-babyna sáıkes, jer ýchaskesine jeke menshik quqyǵyn satyp alý aqysyn tolyq tólegen tulǵanyń jer ýchaskesimen Qazaqstan Respýblıkasynyń zańdarynda tyıym salynbaǵan mámilelerdiń kez kelgen túrin jasasýǵa quqyǵy bar, — deıdi N. Mıheılıs. 

Eske salsaq, osyǵan deıin Astanada qonaqúı qurylysy úshin 26 jer ýchaskesi májbúrlep alynatyndyǵy habarlanǵan.