109 keli esirtki tárkilendi: Kaspıı teńizinde halyqaralyq esirtki arnasynyń joly kesildi
AQTAÝ. KAZINFORM — Ulttyq qaýipsizdik komıteti Kaspıı teńiziniń akvatorııasynda halyqaralyq esirtki arnasynyń jolyn kesti.
Atap aıtqanda, bıyl 1 qarashada Shekara qyzmeti UQK Mańǵystaý oblysy boıynsha departamentimen birlesip, qýdalaýdan júzý quralymen jasyrynýǵa áreket jasaǵan úsh sheteldik azamatty, sondaı-aq jaǵalaý aýmaǵynda Qazaqstan Respýblıkasynyń eki azamatyn ustady.
22 kg apıyn, 27 kg gashısh, 60 kg marıhýana jáne shaǵyn kólemdi júrdek kater tárkilendi.
Atalǵan fakti boıynsha sotqa deıingi tergep-tekserý bastaldy.
Qylmystyq-protsestik kodekstiń 201-babynyń 1-bóligine sáıkes ózge aqparat jarııa etýge jatpaıdy.
Aıta ketelik Qarjylyq monıtorıng agenttiginiń Aqtóbe oblysy boıynsha departamenti esirtki satatyn ınternet-dúken úshin tólem qabyldap, aqsha aýdarýmen aınalysqan qylmystyq toptyń jolyn kesken edi.
