107 jastaǵy ırandyq saılaýǵa túsýge bel býdy
ASTANA. QazAqparat - 107 jastaǵy Iran turǵyny Feızolla Fathı (Feizollah Fathi) jergilikti bılik organy saılaýyna qatysý úshin óz kandıdatýrasyn tirkedi.
Bul týraly seısenbi, 28 naýryzda BBC News habarlady.
Er adam Dıvanderdegi shahrestanǵa (Kúrdistan provıntsııasy) aýyl keńesine daýysqa túsýdi josparlaǵan óziniń 73 jastaǵy zaıyby Djahanmen birge saılaý komıssııasyna kelgen.
Feızolla Fathı eger saılanǵan jaǵdaıda «halyqqa qyzmet etetindigin jáne ózekti máselelerge basty nazar aýdaratyndyǵyn» málimdedi.
Bıliktiń jergilikti organdaryna budan buryn tirkelgen 1889 kandıdattyń jasy 75-ten asady.
Daýys berý 19 mamyrda bolatyn Iran prezıdenti saılaýymen bir ýaqytta ótedi dep kútilip otyr.
Eske sala ketsek,2016 jylǵy ulttyq halyq sanaǵy barysynda ırandyq Kúrdistan provıntsııasynda eldegi eń kári adamdy -134 jastaǵy Ahmada Sýfıdi tapqan bolatyn.
