106 jastaǵy qarııa uzaq ómir súrýiniń sebebin atady
ASTANA. KAZINFORM – Ǵasyr jasaǵan ulybrıtanııalyq áıel uzaq ómir súrýiniń sebebin jalǵyzdyq jáne ázil-qaljyńmen baılanystyryp otyr.
Merı Spırs óziniń kezekti týǵan kúnin qarttar úıinde atap ótti. Bul týraly Daily Record basylymy jazdy.
Ol 1918 jyly tamyzda Manchesterde dúnıege kelgen. Ekinshi dúnıejúzilik soǵys kezinde áskerı avıatsııada qyzmet etken azamatqa ǵashyq boldy. Kóp uzamaı ǵashyǵy ómirden ótedi. Merı oǵan máńgilik adal bolýǵa óz-ózine ýáde etip, eshqashan turmysqa shyqpapty.
Merı eki ápkesimen birge ómirdiń qyzyǵy men shyjyǵyn bir keshken. Bir qyzyǵy, olar da soǵys kezinde ǵashyqtarynan aıyrylyp, sodan beri jigit ataýlydan aýlaq júrgen.
Merı Spırs uzaq ómir súrýiniń sebebi retinde jalǵyzdyq, baısaldylyq jáne ázilge jaqyn bolýdy atap ótti.
Esterińizge salsaq, buǵan deıin Astanada jasy 100-den asqan 21 qarııa turatynyn jazǵan edik.
