106 mektepte býllıngke qarsy jumystyń fındik modeli engiziledi – Premer-Mınıstr
ASTANA. KAZINFORM – 2024 jyldyń 1 qyrkúıeginen 106 mektepte býllıngke qarsy jumystyń fındik modeli pılottyq rejımde engiziledi. Bul jaıynda Senat depýtattarynyń saýalyna Premer-Mınıstr Álıhan Smaıylovtyń jaýabynda aıtylǵan.
«Balalardyń qaýipsizdigin qamtamasyz etý úshin barlyq bilim berý uıymdary Nusqaýlyqqa (2022 jylǵy 30 naýryzda Oqý-aǵartý mınıstrliginiń № 117 buıryǵymen bekitilgen) sáıkes qaýipsizdik júıelerimen jaraqtandyrylady. Búgingi tańda Nusqaýlyqtyń talaptaryna sáıkes keletin bilim berý uıymdary 100 paıyz qaýipsizdik júıelerimen (beınebaqylaý kameralary, jedel basqarý ortalyǵyna qosylý, dabyl túımeleri men týrnıketterdi ornatý, sondaı-aq kúzet agenttikterimen sharttar jasasý) jabdyqtalǵan. Jumysty birkelki jáne sapaly uıymdastyrý úshin barlyq bilim berý uıymdaryna zorlyq-zombylyqqa, býllıngke ushyraǵan kámeletke tolmaǵandardy erte anyqtaý jáne olarǵa kómek kórsetý ádistemesi jetkizildi», - dep atap ótedi Úkimet basshysy jaýabynda.
Onyń málimetinshe, úzdik álemdik tájirıbeni zerdeleý qorytyndysy boıynsha bilim berý uıymdarynda býllıngke qarsy jumystyń fındik modeli engiziledi.
«Osy maqsatta Nazarbaev Zııatkerlik mektepteriniń bazasynda Týrký ýnıversıtetimen (Fınlıandııa) birlesip, 8 myńnan astam muǵalimdi oqytý josparlanýda. 2024 jylǵy 1 qyrkúıekten bastap respýblıkanyń 106 mektebinde baǵdarlamany pılottyq rejımde engizý júzege asyrylatyn bolady. Oqýshylar arasynda aldyn alý sharalaryn kúsheıtý úshin ár mektepke ıývenaldy polıtsııa qyzmetkerleri, ýchaskelik ınspektorlar men jedel ýákilder (barlyǵy 6,5 myń qyzmetker) qatarynan polıtsııa qyzmetkerleri bekitildi. 2023 jyly 14 myńnan astam aldy alý is-sharasy ótkizildi», - dedi Álıhan Smaıylov.
